خواتین کی بے حرمتی اور زیادتی کی خبریں سن کر بہت افسوس ہوتا ہے جوہی چاؤلہ

اخبار پڑھنا اسی لئے پسند نہیں کرتی کہ ہر روز کسی نہ کسی خاتون سے زیادتی کی خبر شائع ہوتی ہے، جوہی چاؤلہ فوٹو : فائل

---

بالی ووڈ کی معروف اداکارہ جوہی چاؤلہ کا کہنا ہے کہ خواتین کی بے حرمتی اور زیادتی کی خبریں سن کر بہت افسوس ہوتا ہے۔

جوہی چاؤلہ نے اداکار اور ہدایت کار فرحان اختر کی خواتین سے زیادتی کے خلاف ''مین اگینسٹ ریپ اینڈ ڈسکریمنیشن'' نامی مہم کو سراہتے ہوئے کہا کہ فرحان اختر نے مہم شروع کرکے بہت اچھا کام کیا ہے اور ہر کسی کو معصوم بچیوں اورخواتین کے ساتھ زیادتی کے بڑھتے ہوئے واقعات کے خلاف اٹھ کھڑا ہونا چاہئے۔ انہوں نے کہا کہ وہ اخبار پڑھنا اسی لئے پسند نہیں کرتیں کہ ہر روز کسی نہ کسی خاتون سے زیادتی کی خبر شائع ہوتی ہے۔

بالی ووڈ اداکارہ کا کہنا تھا کہ بطور ماں ان کے لئے یہ بہت دکھ کی بات ہے کہ آج چھوٹی عمر کی بچیوں کو بھی زیادتی کا نشانہ بنایا جارہا ہے۔ انہوں نے کہا کہ وہ فرحان اختر کو مشورہ دیں گی کہ وہ خواتین سے برابری کے سلوک اور درجہ دینے کے موضوع پر فلمیں بنائیں تاکہ لوگوں کو خواتین کی عزت وتکریم سے متعلق آگاہی دی جاسکے۔