طالبان نے کابل میں سیکورٹی اہلکاروں کے ہمراہ عید منائی

طالبان افغان سیکورٹی فورسز سے بغل گیر ہوئے اور ان کے ساتھ سیلفیاں بنوائیں

ویب ڈیسک June 16, 2018

طالبان نے نماز سے قبل ہتھیار جمع کرائے، فوٹو: ٹوئٹر

افغان طالبان نے دارالحکومت کابل میں غیر مسلح ہوکر شہریوں اور سیکورٹی فورسز کے ساتھ عید منائی۔

غیرملکی خبر رساں ادارے کے مطابق درجنوں طالبان عسکریت پسندوں نے کابل کے مختلف علاقوں میں شہریوں اور سیکورٹی فورسز کے ہمراہ عیدالفطر کی نماز ادا کی، طالبان نے عیدگاہوں میں داخلے کے وقت اپنے ہتھیار سیکورٹی فورسز کے پاس جمع کرائے اور ادائیگی نماز کے بعد شہریوں کے ساتھ ساتھ افغان سیکورٹی فورسز سے بغل گیر ہوئے اور ان کے ساتھ سیلفیاں بنوائیں۔

#Afghan Interior Minister Wais Ahmad Barmak meets with Taliban members who entered #Kabul city during Eid ceasefire pic.twitter.com/6mbnrWu32R
— 1TVNewsAF (@1TVNewsAF) June 16, 2018

کابل پولیس کے ترجمان حشمت استنکزئی نے بتایا کہ طالبان عسکریت پسندوں کو جاتے ہوئے ان کے ہتھیار واپس کردیے گئے، سوشل میڈیا پر زیرگردش تصاویر اور ویڈیوز میں دیکھا جاسکتا ہے کہ خوشی کے اس پرمسرت موقع پر شہری اور سیکورٹی اہلکار طالبان سے گرم جوشی سے عید مل رہے ہیں اور وہاں موجود شہری ان مناظر کو اپنے موبائل فونز میں عکس بند کررہے ہیں۔

واضح رہے کہ افغان صدر اشرف غنی سے عید الفطر کے موقع پر جنگ بندی کا اعلان کیا تھا جس کے ردعمل میں طالبان نے بھی سیز فائر کرتے ہوئے عید کے تینوں دن حملے نہ کرنے کا عہد کیا تھا۔