فیفاورلڈکپ میں ایک اور خاتون رپورٹر شائقین کی بدتمیزی کا نشانہ بن گئی

خاتون رپورٹر خاموش نہ رہیں اور بدسلوکی کرنے والے شخص کو خوب کھری کھری سناڈالی۔ فوٹو: انٹرنیٹ

---

فیفا ورلڈ کپ کی رپورٹنگ کرتے ہوئے ایک اور خاتون رپورٹر کو جنسی ہراسگی کا سامنا کرنا پڑا تاہم خاتون رپورٹر نے بھی بدسلوکی کرنے والے شخص کو خوب کھری کھری سناڈالی۔

روس ان دنوں فیفا ورلڈکپ 2018 کی وجہ سے خبروں کی زینت بناہوا ہے جہاں دنیا بھر سے مداح اپنے پسندیدہ فٹبالرز کو دیکھنے کے لیے پہنچ رہے ہیں اور ایسے میں عوام کو پل پل کی خبروں سے باخبر رکھنے کے لیے میڈیا کے نمائندے بھی وہاں موجود ہیں تاہم لائیو رپورٹنگ کے دوران خواتین رپورٹرز کو جنسی ہراسانی کا سامنا کرنا پڑرہا ہے۔

اس خبر کو بھی پڑھیں؛ فیفا ورلڈ کپ کے دوران خاتون رپورٹر کے ساتھ بدسلوکی

چند روز قبل 'ڈی ڈبلیو' کی خاتون رپورٹر جولیٹ گونزالیز کو لائیو رپورٹنگ کے دوران قریب ہی موجود ایک شخص نے گال پر بوسہ لے کر جنسی طور پر ہراساں کیا اوروہ لائیو ہونے کی وجہ سے کچھ نہ کرسکیں۔

آج ایک اور واقعہ پیش آیا جب برازیل سے تعلق رکھنے والی خاتون رپورٹر جولیا گیوماریس لائیو رپورٹنگ کررہی تھی کہ اس دوران ایک شخص نے ان کے گال پر بوسہ لینے کی کوشش کی لیکن خاتون رپورٹر فوراً ہی پیچھے ہٹ گئیں اور انہیں خوب کھری کھری سنائیں۔

جولیا نے نامعلوم شخص پر اپنا غصہ اتارتے ہوئے کہا کہ ایسا دوبارہ کبھی مت کرنا، جس پر اس شخص نے معافی بھی مانگی مگر پھر بھی خاتون رپورٹر کا غصہ ٹھنڈا نہ ہوا اور وہ مسلسل اس شخص پر چلاتے ہوئے کہہ رہی تھیں کہ میں تمہیں ہرگز ایسا نہیں کرنے دوں گی کیوں کہ یہ تمہارا حق نہیں ہے، اور ایسا کرنے کے بجائے تمہیں خواتین کی عزت کرنی چاہیے۔

Great response from Brazilian TV journalist Julia Guimaraes of Sportv to unacceptable behaviour. Not easy to show such restraint in the face of harassment. https://t.co/eFVZz6gdMA

— Colin Millar (@Millar_Colin) June 24, 2018

بعد ازاں ایک اور ٹی وی کو انٹریو دیتے ہوئے خاتون رپورٹر کا کہنا تھا کہ برازیل میں مجھے ایسے واقعات کا سامنا نہیں کرنا پڑتا مگر یہاں دوسری بار مجھے ہراساں کیا گیا ہے، پچھلی بار تو میں خاموش رہی مگر اس بار مجھے رد عمل دینا پڑا کیوں کہ ان لوگوں کو ایسے سمجھ نہیں آتی تاہم یہ افسوسناک بات ہے اور اب میں خود کو غیر محفوظ سمجھ رہی ہوں۔