نواز شریف کے خطاب سے قبل کارکنوں میں تصادم متعدد زخمی

سانگلہ ہل میں ایک دوسرے پر مکوں، لاتوں، ڈنڈوں اور کرسیوں کا استعمال،پولیس کا لاٹھی چارج۔ فوٹو: فائل

---

مسلم لیگ (ن) کے صدر میاں نواز شریف کے خطاب سے قبل پنڈال پر قبضے کیلئے ن لیگ کے 2 گروپوں کے درمیان تصادم کے نتیجے میں کئی افراد زخمی ہوگئے۔

ایکسپریس نیوز کے مطابق منگل کو سانگلہ ہل میں مسلم لیگ (ن) کے انتخابی جلسے میں دو امیدواروں کے حامیوں کے درمیان نشستوں پر جھگڑا ہو گیا اور بات بڑھ کر ہاتھا پائی تک پہنچ گئی ۔ تصادم میں اپنے سیاسی مخالفین پر کھل کر مکوں، لاتوں، ڈنڈوں اور کرسیوں کا استعمال کیا گیا،جس کے دوران کئی افراد زخمی ہوگئے۔ اس موقع پر پولیس اور ایلیٹ فورس کے اہلکاروں نے مجمع کو کنٹرول کرنے کیلیے لاٹھی چارج بھی کیا۔



ٹی وی رپورٹس کے مطابق مسلم لیگ (ن) کی قیادت کا کہنا ہے کہ دونوں امیدوار میں سے جو بھی کامیاب ہوگا اسے مسلم لیگ (ن) کا امیدوار سمجھا جائے گا۔ادھر شیخوپور میں حلقہ پی پی 167سے ن لیگ کے امیدوار عارف سندھیلہ پر نامعلوم افراد نے تشدد کیا ، جس سے وہ زخمی ہو گئے۔