دہری شہریت کیس سپریم کورٹ نے مراد علی شاہ کو نااہل قرار دے دیا

مراد علی شاہ دہری شہریت چھوڑنے کا سرٹیفکیٹ پیش نہیں کرسکے اس لئے وہ الیکشن لڑنے کے اہل نہیں رہے، عدالت

ویب ڈیسک May 02, 2013

مراد علی شاہ دہری شہریت چھوڑنے کا سرٹیفکیٹ پیش نہیں کرسکے اس لئے وہ الیکشن لڑنے کے اہل نہیں رہے، عدالت۔ فوٹو: فائل

سپریم کورٹ نے دہری شہریت پر پیپلز پارٹی کے سندھ اسمبلی کے امیدوار مراد علی شاہ کو نااہل قرار دے دیا ہے۔

چیف جسٹس افتخار محمد چوہدری کی سربراہی میں سپریم کورٹ کے تین رکنی بنچ نے کیس کی سماعت کی، دوران سماعت عدالت نے دہری شہریت کیس میں سندھ ہائی کورٹ کا فیصلہ کالعدم قرار دیتے ہوئے الیکشن ٹربیونل اور ریٹرننگ آفیسر کا فیصلہ بحال کردیا، عدالت نے اپنے فیصلے میں قرار دیا ہے کہ مراد علی شاہ دہری شہریت چھوڑنے کا سرٹیفکیٹ پیش نہیں کرسکے اس لئے وہ الیکشن لڑنے کے اہل نہیں رہے۔

اس موقع پر چیف جسٹس افتخار محمد چوہدری نے ریمارکس دیئے کہ آئین کے آرٹیکل 62 اور 63 پر پورا نہ اترنے والے الیکشن لڑنے کے اہل نہیں، سیاسی جماعتیں بھی ان افراد کو ٹکٹ دیں جو ان دونوں آرٹیکلز پر پورا اترتے ہیں، دہری شہریت لے کر آئین کے ساتھ روزانہ کا مذاق نہیں ہونا چاہیے۔