پشاور ریپڈ بس منصوبے میں کرپشن کی تحقیقات کا حکم

منصوبہ مقررہ وقت میں مکمل نہ ہونے کی وجہ سے لاگت میں 15 ارب روپے کا اضافہ

ویب ڈیسک July 02, 2018

منصوبہ مقررہ وقت میں مکمل نہ ہونے کی وجہ سے لاگت میں 15 ارب روپے کا اضافہ فوٹو:فائل

قومی احتساب بیورو (نیب) کے چیرمین جسٹس (ر) جاوید اقبال نے پشاور ریپڈ بس منصوبے میں مبینہ کرپشن کی تحقیقات کا حکم دیتے ہوئے کہا ہے کہ تاخیر کے باعث لاگت میں 15 ارب روپے کا اضافہ ہوگیا

چیئرمین نیب نے پشاور بس ریپڈ ٹرانسپورٹ کے خلاف شکایات کی جانچ پڑتال کا حکم دیتے ہوئے کہا کہ منصوبہ مقررہ وقت کے اندر مکمل نہ ہونے کی وجہ سے لاگت میں اضافہ ہوگیا، تاخیر کے ذمہ دار افراد کا تعین کرکے ان کے خلاف کارروائی کی جائے گی، منصوبے کی لاگت کے لیے 49.36 ارب روپے کا تخمینہ لگایا گیا جو بعد میں بڑھ کر 64 ارب روپے ہوگیا۔

پشاور بس ریپڈ ٹرانزٹ منصوبے میں تاخیر پر عوام کی جانب سے سخت اظہار ناراضگی pic.twitter.com/ovMT7sQAgX
— Express News (@ExpressNewsPK) May 5, 2018

چیئرمین نیب نے ڈی جی نیب خیبرپختون خوا کو انکوائری شروع کرنے کا حکم جاری کرتے ہوئے کہا کہ قومی سرمائے کے جائز استعمال کو یقینی بنانے اور بدعنوانی کے خاتمے کے لیے نیب اپنا کام کرتا رہے گا۔

یہ بھی پڑھیں: پشاور میٹرو بس منصوبے کے سی ای او کی برطرفی کے بعد پروجیکٹ افسران مستعفی

علاوہ ازیں پشاور میں نیب ریجنل بورڈ خیبر پختونخوا کا اجلاس ہوا۔ نیب بیورو نے محکمہ جیل خانہ جات، خیبر ٹیچنگ اسپتال اور بلدیاتی حکومت میں خرد برد اور کرپشن کی تحقیقات کی منظوری دے دی۔ نیب نے ایجنسی سرجن مہمند کے خلاف بھی کرپشن کی تحقیقات کی منظوری دے دی۔