پی ٹی آئی کا ضابطہ اخلاق کی خلاف ورزی کرنیوالے ارکان کے خلاف کارروائی کا فیصلہ

اراکین نے آزاد حیثیت سے الیکشن میں حصہ لے کرڈسپلن اورآرٹیکل 62، 63 کی خلاف ورزی کی، ترجمان پی ٹی آئی. (فوٹو:فائل)

---

ISLAMABAD: تحریک انصاف نے ٹکٹ نہ ملنے پر آزاد امیدوار کی حیثیت سے انتخابات میں حصہ لینے والے اپنے اراکین کے خلاف کارروائی کا فیصلہ کرلیا ہے۔

ایکسپریس نیوزکے مطابق تحریک انصاف نے ضابطہ اخلاق کی خلاف ورزی کرنے والے اپنے تمام اراکین کے خلاف کارروائی کا فیصلہ کرلیا ہے اور دو رکنی کمیٹی بھی تشکیل دے دی گئی ہے۔ کمیٹی نعیم الحق اور ارشد داد پر مشتمل ہے، کمیٹی پارٹی ٹکٹ کے خلاف لڑنے والے اراکین کی رپورٹ چیئرمین پی ٹی آئی عمران خان کو پیش کرے گی۔

ترجمان تحریک انصاف کا کہنا ہے کہ تمام ارکین کی جانب سے حلف نامہ جمع کرایا گیا تھا کہ ٹکٹ نہ ملنے کی صورت میں اراکین انتخابات نہیں لڑیں گے لیکن جن افراد کو کسی وجہ سے ٹکٹ نہیں ملے انہوں نے آزاد حیثیت سے انتخابات میں حصہ لے کر پارٹی ڈسپلن کی خلاف ورزی کی اور یہ حلف نامے اور آرٹیکل 62، 63 کی بھی خلاف ورزی ہے۔ ایسے افراد کے نام دو رکنی کمیٹی کو بھیجے جائیں گے اور کمیٹی ایسے امیدواران کے خلاف ضابطے کی کاروائی کرے گی ، اس کاروائی کا آغاز فوری کر دیا جائے گا۔