کیا ملک اس قابل ہے ایک گھر میں 7 بچے ہوں سپریم کورٹ

کم بچے پیدا کرنا شاید دین کیخلاف ہے، خاندانی منصوبہ بندی پر آیات موجود ہیں، چیف جسٹس

Numainda Express July 04, 2018

خواتین کو وقفہ سہولتیں دینی چاہئیں، وزیر صحت سندھ، 3 ہفتے میں تجاویز طلب کر لی گئیں۔ فوٹو:فائل

HARARE: چیف جسٹس میاں ثاقب نثار نے ملک میں آبادی کے بے ہنگم اضافہ پر تشویش کا اظہارکرتے ہوئے آبزرویشن دی ہے کہ کیا ملک اس قابل ہے کہ ایک گھر میں7 بچے پیدا ہوں، کیا ملک میں اس قدر آبادی کیلیے وسائل موجود ہیں؟عوام میں آگاہی نہ ہونے کے برابر ہے،بڑھتی ہوئی آبادی ملک کیلیے ایٹم بم ہے۔

چیف جسٹس میاں ثاقب نثارکی سربراہی میں فل بینچ نے وفاق اورصوبوںکوآبادی کنٹرول کرنے کیلیے موثر پالیسی سازی کی تجاویز طلب کرتے ہوئے ہدایت کی کہ آبادی کو قابوکرنے کا خاکہ بنا کر فراہم کیا جائے۔چیف جسٹس کا کہنا تھا آبادی بڑھنے کا بم پھٹ چکا ہے، ہم اس چکر میں پھنس گئے ہیں کہ کم بچے پیدا کرنا شاید دین کیخلاف ہے۔

ایڈیشنل اٹارنی جنرل نیئر رضوی کاکہنا تھا کہ آبادی میں اضافے کی شرح 2.4فیصد ہے۔جسٹس عمر عطا بندیال نے کہا خاندانی منصوبہ بندی کے حوالے سے قرآن میں آیات موجود ہیں، غربت کے باعث لوگ بچے فروخت کر رہے ہیں،حکومت کو سامنے آکرذمہ داری لینا ہوگی۔

سندھ کی نگراں وزیر بہبود آبادی و صحت عدالت میں پیش ہوئیں اورکہا اولاد میں وقفہ ڈالنے والی خواتین کو سہولیات دینی چاہیے، موبائل فون یا سولر پینل بطور تخفہ دیا جا سکتا ہے اور مردوں کیلیے بھی موبائل فون بطور تحفہ دیا جا سکتا۔

چیف جسٹس نے سابق وزیر اعظم نواز شریف کے سابق پرنسپل سیکریٹری فواد حسن فواد سے کہاآپ ملک کے نائب وزیر اعظم تھے توآپ نے اپنے دور میں آبادی کا مسئلہ کیوں نہیں دیکھا۔ان کا کہنا تھا وزیر اعظم نے تمام وزرائے اعلیٰ کو ہدایات جاری کی تھیں تاہم نیشنل پاپولیشن پالیسی نہیں بنائی گئی۔

عدالت نے قراردیا کہ اٹارنی جنرل اور فواد حسن فواد، وزیر صحت و بہبود آبادی سندھ بھی پالیسی کیلئے تین ہفتوں کے اندر تجاویز دیں۔ سپریم کورٹ نے بھارتی شہری سید حسن علی کی پاکستانی شہریت سے متعلق مقدمہ کی سماعت کرتے ہوئے معاملہ وزارت داخلہ کو بھیج دیا ہے اور انکی شہریت کا تعین کرتے ہوئے فیصلہ کرنے کی ہدایت کی ہے ۔

عدالت نے شہریت کے حصول کیلیے 50لاکھ روپے جمع کرانے کا وزارت داخلہ کا نوٹیفکیشن بھی معطل کر دیا۔ سید علی حسن نے 2005 میں پاکستانی خاتون سے شادی کی تھی۔