کراچی میں فیکٹری میں لگنے والی آگ بے قابو کئی فائر فائٹرز زخمی

فائر بریگیڈ کی 13 گاڑیاں اور ایک اسنارکل آگ بجھانے میں مصروف ہے، فائر بریگیڈ حکام۔ فوٹو : فائل

---

سائٹ ایریا میں فوم کی فیکٹری میں لگنے والی آگ بے قابو ہوگئی جس کے نتیجے میں 5 فائر فائٹرز زخمی ہوگئے۔

کراچی کے علاقے سائٹ ایریا میں فوم کی فیکٹری میں لگنے والی آگ بے قابو ہوگئی جب کہ آگ بجھانے کی کوشش کے دوران 5 فائر فائٹرز زخمی ہوگئے، ریسکیو ذرائع کے مطابق فیکٹری میں آگ صبح کے وقت لگی اور آگ لگنے کی اطلاع ملتے ہی فائر بریگیڈ کی گاڑیاں فوراً موقع پر پہنچ گئیں تاہم فیکٹری میں فوم کی وجہ سے آگ نے شدت اختیار کرلی ہے۔

فائر بریگیڈ حکام کے مطابق فائر بریگیڈ کی 13 گاڑیاں اور ایک اسنارکل آگ بجھانے میں مصروف ہے جب کہ آگ کے باعث عمارت کے کئی حصے گرگئے ہیں جس کے نتیجے میں 5 فائرفائٹرز زخمی ہوگئے جنہیں اسپتال منتقل کردیا گیا ہے۔

دوسری جانب پولیس اور رینجرز نے فیکٹری کو گھیرے میں لے لیا جب کہ فیکٹری کے تمام ملازمین کو بحفاظت باہر نکال لیا گیا ہے۔