کراچیاورنگی ٹاؤن میں نامعلوم افراد کی گھر میں گھس کر فائرنگ5 افراد جاں بحق

فرید کالونی کی گلی نمبر 7 میں صبح ساڑھے گیارہ بجے کے قریب 6 افراد ایک گھر میں گھسے اور وہاں موجود تمام افراد کو ایک ایک کرکے قتل کردیا فوٹو: فائل

---

KARACHI: اورنگی ٹاؤن کی فرید کالونی میں نامعلوم افراد ایک گھر میں گھس کر فائرنگ کرکے 3 خواتین اور ایک بچی سمیت 5 افراد کو قتل کرکے فرار ہوگئے۔

ایکسپریس نیوز کے مطابق مومن آباد تھانے کی حدود میں اورنگی ٹاؤن کے علاقے فرید کالونی کی گلی نمبر 7 میں صبح ساڑھے گیارہ بجے کے قریب 6 افراد ایک گھر میں گھسے اور وہاں موجود تمام افراد کو ایک ایک کرکے قتل کردیا۔ قتل ہونے والوں میں تین خواتین اور ایک بچی سمیت 5 افراد شامل ہیں، مقتول مرد ان کا قریبی عزیز ہے جو کہ گزشتہ رات آیا تھا جبکہ خاندان کے مرد حضرات میں سے اس وقت وہاں کوئی موجود نہیں تھا۔ فائرنگ کے دوران اہل محلہ خوف زدہ ہوکر اپنے گھروں میں ہی محصور ہوگئے تاہم ملزمان کے فرار ہونے کے بعد انہوں نے پولیس کو اطلاع دی۔

پولیس نے جائے واقعہ سے شواہد اکٹھے کرکے متقول افراد کی لاشوں کو عباسی اسپتال منتقل کردیا ہے۔ ایس ایچ او مومن آباد کے مطابق فائرنگ کا یہ واقعہ دیرینہ دشمنی کا شاخسانہ لگتا ہے تاہم تفتیش کے بعد ہی حتمی طور پر کچھ کہا جاسکتا ہے۔