UNITED NATIONS:
بھنگوریہ گوٹھ میں پولیس افسر کا بیٹا دوست پر فائرنگ کرکے فرارہوگیا۔
ہفتہ اور اتوار کے درمیانی شب عزیزآباد تھانے کی حدود بلاک2 کے قریب فائرنگ کے واقعے میں ایک نوجوان شدید زخمی ہو گیاجسے تشویشناک حالت میں فوری طور پر نارتھ ناظم آباد میں واقع نجی اسپتال منتقل کردیا گیا،بعدازاں زخمی نوجوان کو اسٹیڈیم روڈ پر واقع نجی اسپتال منتقل کردیا گیا۔
پولیس نے بتایا کہ زخمی نوجوان کی شناخت وامق ولد محمد عارف کے نام سے کر لی گئی مضروب مکان نمبر 158/2 بلاک 2 بھنگوریہ گوٹھ کا رہائشی ہے پولیس کے مطابق زخمی نوجوان کواویس نامی ملزم نے فائرنگ کرکے شدیدزخمی کیا ہے، ملزم کاباپ انسپکٹردین محمد برفت جامشورو میں تعینات ہے، زخمی نوجوان کے کزن نے بتایا وہ لوگ ریسٹورینٹ پر چائے پینے بیٹھے تھے کہ اسی دوران انسپکٹر دین محمد برفت کا بیٹا اویس وہاں آیا اور اس نے مذاق میں اپنی پستول وامق پر تان لی جس کے بعد وامق وہاں سے بھاگنے لگا تو ملزم وایس نے وامق پر گولی چلادی جواس کی گردن پرلگی اوروہ شدید زخمی ہو گیا جس کے بعد اویس جائے وقوع سے اپنی پستول کا خول اٹھایااور فرار ہوگیا۔
بعدازاں عزیز آباد پولیس نے ملزم اویس برفت کے خلاف زخمی نوجوان کے والد محمد عارف کی مدعیت میں مقدمہ الزام نمبر 220/ 2018بجرم دفعہ 324 کے تحت درج کرکے مفرور ملزم کی تلاش میں چھاپے مارناشروع کردیے ہیں۔
شفیق موڑ :ٹیلر کی دکان میں فائرنگ سے نوجوان ہلاک
نارتھ کراچی شفیق موڑ کے قریب قائم ٹیلر ماسٹر کی دکان میں گزشتہ روز ایک ملزم داخل ہوا اور اس نے دکان میں داخل ہوتے ہی دکاندار پر فائرنگ کردی جس سے وہ موقع پر ہی دم توڑ گیا جبکہ ملزم فرار ہونے میں کامیاب ہوگیا ، واقعے کے بعد لاش کو فوری طور عباسی شہید اسپتال منتقل کیا گیا۔
پولیس حکام کے مطابق مرنے والے کی شناخت 26 سالہ ذیشان ولد رمضان کے نام سے کی گئی جوکہ علاقے کا ہی رہائشی تھا ، ذیشان کا ملزم عمران سے جھگڑا چل رہا تھا اور ملزم عمران نے ہی اسے فائرنگ کرکے ہلاک کیا ، پولیس نے جائے وقوع سے گولیوں کے پانچ خول قبضے میں لے لیے جبکہ ملزم کی تلاش میں مختلف مقامات پر چھاپے مارے جارہے ہیں ، پولیس نے واقعے کی مزید تحقیقات کا آغاز کردیا ہے۔