شہر کے تمام پولنگ اسٹیشنوں پر فوج تعینات کی جائے عارف علوی

عمران خان 9 مئی کو کراچی کا دورہ کرینگے،ملک بھر سے کامیابی حاصل کرینگے۔ فوٹو: فائل

---

کراچی میں این اے 250 سے تحریک انصاف کے امیدوار ڈاکٹر عارف علوی نے کہا ہے کہ کراچی میں پرامن الیکشن کیلیے ضروری ہے کہ حکومت فوری طور پر11مئی کو تمام پولنگ اسٹیشنوں پر فوج تعینات کرے۔

تحریک انصاف کراچی میں دہشت گردی کے واقعات کی بھرپور مذمت کرتی ہے،ڈاکٹر عارف علوی اتوار کو پریس کلب میں پریس کانفرنس کررہے تھے،اس موقع پر پی ایس 112 اور 113 سے امیدوار ثمر علی خان اور خرم شہزاد بھی موجود تھے، انھوں نے کہا کہ انتخابی مہم کے دوران ملک بھر میں دہشت گردی کے واقعات کی تحریک انصاف مذمت کرتی ہے،اتوار کو مردان میں تحریک انصاف کے الیکشن دفتر پر حملے میں کئی کارکن زخمی ہوئے ہیں،کراچی میں سیاسی جماعتوں کے دفاتر پر حملے افسوسناک ہیں۔



پرامن انتخابات کے انعقاد کیلیے حکومت نے عملی اقدامات نہ کیے تو امن وامان کی صورتحال مزید خراب ہوجائیگی،حکومت تمام سیاسی اور مذہبی جماعتوں کے امیدواروں اور ان کے دفاتر کو تحفظ فراہم کرے،پورے شہر میں تحریک انصاف بھرپور انداز میں اپنی انتخابی مہم چلا رہی ہے،11 مئی تبدیلی کا دن ہوگا اور تحریک انصاف ملک بھر میں بھرپور کامیابی حاصل کریگی،یکم مئی کا جلسہ بعض سیاسی وجوہات اور سیکیورٹی خدشات پر منسوخ کیا تھا، عمران خان 9 مئی کو کراچی کا دورہ کریں گے۔