ن لیگ کا طویل دورانیے کی احتجاجی حکمت عملی اختیار نہ کرنے کا فیصلہ

نواز اور مریم کی واپسی پر امن وامان خراب کرنے کی کوشش پر قانونی کارروائی کا حکومتی فیصلہ

عامر خان July 13, 2018

نواز اور مریم کی واپسی پر امن وامان خراب کرنے کی کوشش پر قانونی کارروائی کا حکومتی فیصلہ۔ فوٹو : فائل

مسلم لیگ (ن) نے نواز شریف اور مریم نواز کی وطن واپسی اور ممکنہ گرفتاری کے بعد ''طویل دورانیے کی احتجاجی حکمت عملی اختیار نہ کرنے کا فیصلہ کیا ہے جب کہ وقتی احتجاج کے بعد (ن) لیگ کی قیادت ''انتخابی مہم ''کو تیز کرے گی۔

(ن) لیگی ذرائع سے معلوم ہوا ہے کہ مسلم لیگ (ن) کی قیادت نے نواز شریف اور مریم نواز کی وطن واپسی کے موقع پر استقبالیہ ریلی اور ممکنہ عوامی اجتماع کے حوالے تفصیلی مشاورت کی ہے ۔اس مشاورت میں جائزہ لیا گیا ہے کہ نواز شریف اور مریم نواز کی وطن واپسی کے بعد اگر ان کوائیر پورٹ سے باہر نہیںآنے دیا جاتا ہے اور ممکنہ طور پرگرفتار کرلیا جاتا ہے تو ردعمل کے طور پر امن احتجاج کیا جائے گا ۔

(ن) لیگ کی جانب سے اس احتجاج میں مظاہرے ،جیل کی طرف مارچ اورجیل کے ہاہر علامتی یا ممکنہ طور پرکچھ وقت یا دن کیلیے دھرنا دینے کے آپشنز میںشامل ہیں تاہم طویل المدت دھرنا دینے کے آپشن پر فوری عمل درآمد نہیں کیا جائے گا۔

(ن) لیگ کے ذرائع کا کہنا ہے کہ ایک مرتبہ نواز شریف اور مریم نواز کی کوشش ہوگی کہ ایئرپورٹ سے باہر آخر وہ مختصرا خطاب کرکے گرفتاری دے دیں۔گرفتار ہونے کے بعد نواز شریف اور مریم نواز کا عوام کے نام اہم بیان پر ریکارڈ پرمبنی ویڈیو پیغام سامنے آسکتا ہے۔

دوسری جانب حکومتی ذرائع کا کہنا ہے کہ نواز شریف اور مریم نواز کی گرفتاری کیلیے نیب ٹیم کو ہر ممکن سیکیورٹی اور ممکنہ سہولیات فراہم کی جائیں گی ۔ نواز شریف اور مریم نواز کی ممکنہ وطن واپسی کے موقع پر (ن) لیگ کی جانب سے امن وامان خراب کرنے کی کوشش کی گئی تو حکومت کی جانب سے قانونی آپشنز کے مطابق کارروائی عمل میں لائی جاسکتی ہے ۔

مسلم لیگ (ن) کے مرکزی سیکریٹری اطلاعات مشاہد اللہ خان نے ایکسپریس کو بتایاکہ نواز شریف اور مریم نواز کی وطن واپسی پر تاریخی استقبال ہوگا۔ ان کی گرفتاری کے خلاف عوامی احتجاج کیا جائے گا ۔اس احتجاج کی مدت طویل نہیں ہوگی ہم احتجاج کے ساتھ ساتھ الیکشن میں کامیابی کیلیے عوامی رابطہ مہم بھی جاری رکھیں گے ۔