راولپنڈی کی احتساب عدالت نے سابق چیرمین اوگرا توقیر صادق کو 3 سال قید کی سزا سنادی

توقیر صادق پر 80 ارب روپے سے زائد کرپشن کے الزامات ہیں اور ان کے خلاف سپریم کورٹ میں بھی مقدمات زیرسماعت ہیں۔ فوٹو: فائل

---

احتساب عدالت نے سابق چیرمین اوگرا توقیر صادق کو 3 سال قید کی سزا سناتے ہوئے ان کی منقولہ اورغیرمنقولہ جائیداد ضبط کرنے کا بھی حکم دیا ہے۔

احتساب عدالت نے سابق چیئرمین اوگرا توقیر صادق کے کیس کی سماعت کی، دوران سماعت عدالت نے سابق چیئرمین اوگرا توقیر صادق کو ان کی غیرحاضری میں 3 سال قید کی سزا سنادی، اس موقع پر عدالت نے توقیر صادق کی منقولہ اور غیر منقولہ جائیداد اور اکاؤنٹ ضبط کرنے کا حکم دیتے ہوئے ان کے دائمی وارنٹ گرفتاری بھی جاری کردیئے،عدالت نے کیس کے دیگر ملزموں کے خلاف سماعت 14 مئی تک ملتوی کر دی۔

واضح رہے کہ سابق چیرمین اوگرا توقیر صادق پر 80 ارب روپے سے زائد کرپشن کے الزامات ہیں اور ان کے خلاف سپریم کورٹ میں بھی مقدمات زیرسماعت ہیں جس میں عدالت نے ان کی گرفتاری کا حکم جاری کر رکھا ہے۔