عید الفطر اندرون ملک جانیوالوں کیلئے 2 اسپیشل ٹرینیں چلانے کا اعلان

عید اپنے پیاروں کے ساتھ منانے کیلیے اندرون ملک جانیوالے شہری اسپیشل ٹرین کا ٹکٹ لینے کے لیے قطار میں کھڑے ہیں۔ فوٹو ایکسپریس

---

محکمہ ریلوے نے عیدالفطرکے موقع پرکراچی سے اندرون ملک جانیوالوں کیلیے2اسپیشل ٹرینیں چلانے کا اعلان کیا ہے جبکہ تیسری اسپیشل ٹرین پشاور تا لاہور چلائی جائے گی،تفصیلات کے مطابق محکمہ ریلوے نے عید الفطرکے موقع پر اندرون ملک جانیوالوں کے لیے 2 اسپیشل ٹرینیں چلانے کا اعلان کیا ہے۔

پہلی عید اسپیشل ٹرین 16اگست کو صبح11بجے کینٹ اسٹیشن سے روانہ کی جائے گی جو براستہ خانیوال ، ساہیوال اور لاہور سے ہوتی ہوئی پشاور پہنچے گی جبکہ دوسری عید اسپیشل ٹرین17اگست کو صبح11بجے کینٹ اسٹیشن سے روانہ کی جائے گا جو فیصل آباد سے ہوتی ہوئی راولپنڈی پہنچے گی ،یہ بات محکمہ ریلوے کراچی ڈویژن کے ترجمان ڈویژنل کمرشل آفیسر شعیب عادل نے ایکسپریس سے گفتگو کرتے ہوئی بتائی انھوں نے بتایا کہ تیسری عید اسپیشل 18اگست کو پشاور تا لاہور کے لیے چلانے کا اعلان کیا ہے۔

انھوں نے بتایا کہ عید اسپیشل12بوگیوں پر مشتمل ہو گی ، اگر تھری ٹائر یعنی3 برتوں والی بوگی ہوئی تو فی بوگی60اور اگر2 برتوں والی بوگی ہوئی تو اس میں70مسافر سفر کرسکیں گے اسطرح ایک عید اسپیشل ٹرین میں720 یا 840 مسافر سفر کر سکیں گے مجموعی طور پر دونوں عید اسپیشل ٹرینوں میں زیادہ سے زیادہ1680 مسافر سفر کرسکیں گے۔