نواز شریف اور مریم نواز کو جیل کے مچھر ستانے لگے

میاں نواز شریف شدید حبس کے باعث متعدد مرتبہ گھبراہٹ کا اظہار کرچکے ہیں، جیل ذرائع

ویب ڈیسک July 18, 2018

جیل ذرائع کا کہنا ہے کہ دونوں باپ بیٹی کو جیل میں گرمی اور حبس سے شدید پریشانی کا سامنا کرنا پڑتا ہے فوٹوفائل

سابق وزیر اعظم نواز شریف اور ان کی صاحبزادی مریم نواز پانچ روز گزرنے کے باوجود خود کو جیل کے ماحول میں ڈھال نہیں سکے ہیں دونوں نے جیل حکام سے مچھروں اور صفائی ستھرائی سے متعلق شکایات کی ہیں۔

ایون فیلڈ ریفرنس میں سزا یافتہ سابق وزیراعظم نواز شریف اور ان کی صاحبزادی مریم نواز کو اڈیالہ جیل میں پانچ روز گزر گئے ہیں لیکن دونوں ابھی تک خود کو جیل کے ماحول میں ڈھال نہیں سکے ہیں۔ ایکسپریس نیوز کے مطابق دونوں باپ بیٹی جیل میں حبس اور گرمی سے شدید پریشان ہیں۔

جیل ذرائع کا کہناہے کہ میاں نواز شریف شدید حبس کے باعث متعدد مرتبہ گھبراہٹ کا اظہار کرچکے ہیں، اس کے علاوہ دونوں باپ بیٹی جیل میں مچھروں کی موجودگی کے بارے میں بھی آگاہ کرچکے ہیں۔ جیل حکام کا کہنا ہے کہ جیل میں ہر روز شام کے اوقات میں مچھر مار اسپرے کیاجاتا ہے تاہم برسات کے موسم کے باعث جیل میں مچھر زیادہ ہیں۔

اس خبرکوبھی پڑھیں: مریم نواز کو سہالہ ریسٹ ہاؤس منتقل کرنے کا فیصلہ

دوسری جانب نواز شریف اور کیپٹن ریٹائرڈ صفدر کو جیل میں بی کلاس مل گئی ہے تاہم مریم نواز خواتین وارڈ میں عام قیدی ہیں۔ مریم نواز کو آئندہ 24 گھنٹوں کے دوران اڈیالہ جیل سے ریسٹ ہاؤس منتقل کرنے کا فیصلہ کیاگیا ہے، سہالہ ریسٹ ہاؤس کو پہلے سے سب جیل قرار دے دیا گیا ہے۔ مریم نواز کی جیل سے ریسٹ ہاؤس منتقلی کا فیصلہ سیکیورٹی خدشات کے باعث کیاگیاہے۔