لاہورسمیت پنجاب کے مختلف حصوں میں بارش سے 7 افراد جاں بحق

بارش سے کئی گھروں میں صف ماتم بچھ گیا: فوٹو: فائل

---

پنجاب کے مختلف شہروں میں بارش کے نتیجے میں چھتیں گرنے اور کرنٹ لگنے کے واقعات میں 7 افراد جاں بحق ہو گئے۔

ایکسپریس نیوزکے مطابق پنجاب سمیت لاہور اور اس کے ملحقہ علاقوں میں رات گئے بادل جم کر برسے جس سے موسم تو خوشگوار ہوگیا تاہم کئی گھروں میں صف ماتم بچھ گیا۔ موسلا دھار بارش سے چھتیں گرنے اور کرنٹ لگنے کے واقعات میں 7 افراد جاں بحق جبکہ 5 افراد زخمی ہوگئے۔

اسلام آباد کے جی سکس ون ٹومیں شارٹ سرکٹ کے باعث تین بچوں سمیت چارافراد جاں بحق ہوگئے۔ امدادی ذرائع کے مطابق بارش کے باعث بجلی کا کرنٹ چھت کے ذریعے کمرے تک پہنچا۔

شیخوپورہ کے نواحی علاقے بھکھی میں بھی طوفانی بارش کے باعث مکان کی چھت گرگئی۔ ملبے تلے دب کر ماں اوردو بیٹیوں سمیت تین افراد جاں بحق ہو گئے۔ شیخوپورہ میں ہی ساھوکی ملیاں میں مکان کی چھت گرنے سے 5 افراد زخمی ہوگئے۔

دوسری جانب صوابی میں بھی موسلا دھار بارش سے نشیبی علاقے زیر آب آگئے جبکہ دو دیہات کو ملانے والا پل سیلابی ریلےمیں بہہ گیا۔

محکمہ موسمیات کا کہنا ہے کہ آج راولپنڈی، گوجرانوالہ، لاہور، فیصل آباد، مالاکنڈ، ہزارہ ڈویژن میں کہیں کہیں بادل برس سکتے ہیں۔ ژوب، قلات، سرگودھا، ڈی جی خان، ساہیوال ڈویژن اور گلگت بلتستان میں چند مقامات پر بارش کا امکان ہے۔