سنی تحریک کاکراچی میں فوج کی نگرانی میں دوبارہ الیکشن کرانے کامطالبہ

الیکشن کے نتائج کو کالعدم قرار دینے اور تمام حلقوں میں ری پولنگ کرانے کے لئے عدالت سے رجوع کریں گے، ثروت اعجاز قادری۔ فوٹو: ایکسپریس نیوز

---

لاہور:

سربراہ سنی تحریک ثروت اعجاز قادری نے کراچی و حیدرآباد میں انتخابی نتائج کو کالعدم دینے اور تمام حلقوں میں دوباہ انتخابات کرانے کا مطالبہ کیا ہے۔

سنی تحریک سربراہ ثروت اعجاز قادری نے کہا ہے کہ شہر میں ٹھپہ مافیہ نے 11 مئی کی صبح سے پولنگ اسٹیشنوں پر قبضہ کرلیا تھا، شہر بھر میں پولنگ کے دوران دھاندلی ہوئی جس کے واضح ثبوت موجود ہیں۔ انہوں نے کہا کہ کراچی کے تمام حلقوں میں دوبارہ انتخابات فوج کی نگرانی میں کرائے جائیں اوراس دوران فوجی جوانوں کو پولنگ اسٹیشنز کے اندر تعینات کیا جائے۔

ثروت اعجاز قادری نے کہا کہ دھاندلی کے حوالے سے الیکشن کمیشن کو ایک خط بھی لکھا جائے گا جبکہ نتائج کو کالعدم قرار دینے اور تمام حلقوں میں دوبارہ پولنگ کرانے کے لئے عدالت سے رجوع کریں گے۔