غیراخلاقی زبان کا استعمال پرویزخٹک نے غیرمشروط معافی مانگ لی

میرے موکل نے جوکہا وہ غیراختیاری تھا اوران کے الفاظ پرشرمندہ ہوں، وکیل پریزخٹک

ویب ڈیسک August 01, 2018

پرویز خٹک نے انتخابی مہم کے دوران مخالف جماعت کے ووٹرز کے خلاف نازیبا زبان استعمال کی تھی فوٹو: فائل

سابق وزیراعلیٰ خیبرپختونخوا پرویزخٹک نے انتخابی مہم کے دوران غیر اخلاقی زبان استعمال کرنے پر الیکشن کمیشن سےغیرمشروط معافی مانگ لی۔

چیف الیکشن کمشنر سردار رضاکی سربراہی میں 4 رکنی بنچ نے انتخابی مہم کےدوران پرویزخٹک کی غیر اخلاقی زبان استعمال کرنے کے معاملے کی سماعت کی۔ پرویزخٹک کی جانب سے ان کے وکیل بشیرمہمند پیش ہوئے۔

سماعت کے دوران بشیرمہمند نے موقف اختیارکیا کہ پرویز خٹک نے جو کہا وہ غیراختیاری تھا، اپنے موکل کی جانب سے ادا کئے گئے الفاظ پرشرمندہ ہوں اورغیرمشروط معافی مانگتا ہوں۔

الیکشن کمیشن نے ریمارکس دیئے کہ اگر پرویز خٹک نے نازیبا گفتگو پر افسوس کا اظہار کیا تو اس کا ویڈیو ثبوت پیش کیا جائے، الیکشن کمیشن نے کیس کی سماعت 9 اگست تک ملتوی کردی۔

واضح رہے کہ پرویز خٹک نے انتخابی مہم کے دوران مخالف جماعت کے ووٹرز کے خلاف نازیبا زبان استعمال کی تھی، الیکشن کمیشن نےپرویزخٹک کے ناشائستہ کلمات کا نوٹس لیا تھا۔