نوشہرہ میں پشتو گلوکارہ ریشم شوہر کے ہاتھوں قتل

ریشم کی 9 ماہ قبل شادی ہوئی تھی لیکن ان کے تعلقات بہتر نہیں تھے، بہن

---

اکبر پوره میں مقامی گلوکاره اور اداکارہ ریشم کو مبینہ طور پر تشدد کا نشانہ بناکر قتل کردیاگیا۔

ایکسپریس نیوز کے مطابق نوشہرہ کے علاقے جب کہ داود زئی اکبر پوره میں رہائش پذیر پشتو گلوکارہ ریشم کو اس کے شوہر نے مبینہ طور پر قتل کردیا۔ 35 سالہ ریشم کی 9 ماہ قبل وقاص نامی شخص سے شادی ہوئی تھی۔ پولیس کی ابتدائی رپورٹ کے مطابق خاتون کو تشدد کا نشانہ بنا کر قتل کیا گیا ہے، واقعے کے بعد مقتولہ کا شوہر فرار ہو چکا ہے جب کہ پولیس نے مقتولہ کی بہن کی مدعیت میں وقاص کے خلاف تھانه اکبر پوره میں مقدمہ درج کرلیا ہے۔



ایف آئی آر کے متن میں کہا گیا ہے کہ مقتولہ رامین عرف ریشم کے سسرال سے خبر آئی کہ ان کی بہن کا انتقال ہوگیا ہے اور وہ آکر متوفی کی تجہیز و تدفین میں شرکت کریں، میت کے غسل کے دوران انہوں نے متوفی کے جسم پر تشدد کے نشان دیکھے تو انہیں شک گزرا۔ وہ میت کو قریبی اسپتال لے گئے جہاں ڈاکٹروں نے موت سے پہلے رامین پر تشدد کی تصدیق کردی۔ رامین اور وقاص کی 9 ماہ قبل شادی ہوئی تھی تاہم دنوں کے درمیان ناچاقی چل رہی تھی، کچھ عرصہ قبل ہی دونوں کے درمیان سمجھوتہ کرایا گیا تھا۔