لاہور تعلیمی بورڈ کے درجنوں ملازمین کو بغیر نوٹس برطرف کردیا گیا

بر طرف ملازمین میں اکثریت پرنٹنگ مشین مکینکس کی ہے فوٹو:فائل

---

تعلیمی بورڈ انتظامیہ نے 40 ملازمین کو کسی نوٹس کے بغیر اچانک برطرف کردیا۔

ایکسپریس نیوز کے مطابق لاہور تعلیمی بورڈ انتظامیہ نے 40 ملازمین کو کسی نوٹس کے بغیر اچانک برطرف کرکے ان کے گھروں کے چولہے ٹھنڈے کردئیے، برطرف کیے گئے ملازمین میں اکثریت پرنٹنگ مشین مکینکس کی ہے اور وہ گزشتہ 15 سال سے ادارے میں ملازمت کررہے تھے۔

متاثرین کا کہنا ہے کہ اچانک برطرفی کا کوئی جواز نہیں، عمران خان کے نئے پاکستان میں ہمارا معاشی قتل کیا گیا ہے۔ متاثرین نے عمران خان کی لاہور آمد پر ان کی رہائش گاہ کے باہر احتجاج کرنے کا اعلان کیا ہے۔

دوسری جانب لاہور تعلیمی بورڈ انتظامیہ کا کہنا ہے کہ برطرف ملازمین ڈیلی ویجز ملازم تھے لہٰذا انہیں نوٹس دینا ضروری نہیں تھا۔