حادثات و واقعات میں3افراد ہلاک12زخمی

رات گئے قومی شاہراہ پر واقع مسائخ اسٹاپ پر تیز رفتار کوچ کی ٹکر سے 10 سالہ گلزار سولنگی جاں بحق ہوگیا. فوٹو: فائل

---

قاضی احمد اور نواح میں مختلف حادثات و واقعات کے باعث 3 افراد ہلاک جبکہ 12 زخمی ہوگئے جنھیں اسپتال میں داخل کرادیا گیا ہے۔

تفصیلات کے مطابق ٹنڈوالٰہیار کے رہائشی کولہی مزدور پیر جوگوٹھ سے گندم کی کٹائی کے بعد ٹرک میں سوار ہوکرواپس جارہے تھے کہ نواب ولی محمد کے قریب قومی شاہراہ پر ڈرائیور کو اچانک نیند آنے کے باعث ٹرک کنٹرول سے باہر ہوکر الٹ گیا جس کے نتیجے میں ٹرک میں سوار 32 سالہ گجرا اور ایک عورت ہلاک جبکہ ہیرو، پیرو، حیدر اور دیوو سمیت 7 مزدور زخمی ہوگئے۔



زخمیوں اور ہلاک شدگان کو مقامی اسپتال پہنچایا گیا۔ علاوہ ازیں آصف کالونی موڑ پوائنٹ پر معمولی تنازعے پر سیال اور عمرانی برادریوں کے درمیان تصادم ہوگیا جس میں لاٹھیوں اور کلہاڑیوں کا آزادانہ استعمال کیا گیا جس کے نتیجے میں دونوں جانب سے 5 افراد زخمی ہوگئے جنھیں فوری طور پر اسپتال میں داخل کیا گیا ہے۔

مقامی پولیس نے رپورٹ درج کرکے زخمیوں کو اسپتال بھیج دیا ہے۔ ادھر رات گئے قومی شاہراہ پر واقع مسائخ اسٹاپ پر تیز رفتار کوچ کی ٹکر سے 10 سالہ گلزار سولنگی جاں بحق ہوگیا، ڈرائیور کوچ سمیت فرار ہونے میں کامیاب ہوگیا۔