کراچی فائرنگ اور پرتشدد واقعات میں خاتون سمیت 6 افراد جاں بحق

پیرآباد کے علاقے نیو میانوانی کالونی میں ملزمان کی فائرنگ سے 70 سالہ شفیق بابا اور 40 سالہ خاتون بختی کرم جاں بحق ہوگئی فوٹو: فائل

---

شہر میں نامعلوم افراد نے فائرنگ اور پرتشدد واقعات میں خاتون سمیت 6 افراد کو موت کی نیندسلادیا گیا جبکہ پولیس ان وارداتوں میں ملوث کسی بھی ملزم کو گرفتار نہیں کرسکی۔

روشنیوں کے شہرکراچی سے موت کےاندھیرے نہ چھٹ سکے، دن رات لاشیں گرنامعمول بن گیا ، پولیس کے مطابق ناظم آباد انکوائری آفس کے قریب جماعت اسلامی کے سابق یوسی ناظم عابد الیاس کو موٹر سائیکل سوار ملزمان نے فائرنگ کرکے قتل کردیا ، عابد الیاس کو سینے اور سر پر 3 گولیاں پیوست ہوئی اور وہ موقع پر ہی جاں بحق ہوگئے جبکہ جمعرات اور جمعہ کی درمیانی شب پیرآباد کے علاقے نیو میانوانی کالونی میں ملزمان کی فائرنگ سے 70 سالہ شفیق بابا اور 40 سالہ خاتون بختی کرم جاں بحق ہوگئیں،ڈی ایس پی اورنگی ٹاؤن کے مطابق بختی کرم کو اس کے شوہر اور دیگر رشتے داروں نے غیرت کے نام پر قتل کیا جبکہ اس سلسلے میں مزید تفتیش کی جارہی ہے ۔

بلدیہ ٹاون رشید آباد اور کالا پل سے 2 افراد کی لاشیں ملیں ، اورنگی ٹاؤن کے علاقے پاکستان بازار کے قریب سیاسی جماعت کے کارکن عبدالجبار کو موت کی نیند سلادیا گیا ، ان وارداتوں میں ملوث پولیس کسی بھی ملزم کو گرفتار کرنے میں ناکام ہے۔