عمران خان نے برطانیہ سے الطاف حسین کووارننگ جاری کرنے کا مطالبہ کردیا

عمران خان نے برطانوی ہائی کمشنر ایڈم تھامسن سے کہا کہ برطانوی حکومت الطاف حسین کے متناذعہ بیان کا نوٹس لیتے ہوئے قانون کے مطابق کارروائی کرے۔

برطانوی ہائی کمشنر ایڈم تھامسن نے شوکت خانم اسپتال لاہور میں عمران خان کی عیادت کی اور اس موقع پر عمران خان نے ان سے کہا کہ الطاف حسین نے اشتعال انگیز تقریر کرکے برطانوی قانون کی خلاف ورزی کی ہے، انہوں نے کہا کہ برطانوی حکومت الطاف حسین کو وارننگ جاری کرے اور ان کے خلاف قانون کے مطابق کارروائی کرے۔

اس سے قبل اے این پی کے رہنما غلام احمد بلور نے عمران خان کی عیادت کی اور خیبرپختونخوا میں حکومت سازی کے حوالے سے بھرپور تعاون کی یقین دہانی کرائی، انہوں نے عمران خان کوانتخابات میں کامیابی پر مبارکباد دی اور پشاورکی نشست چھوڑنے پربات کی۔ پاکستان کرکٹ بورڈ کے چیئرمین ذکا اشرف اور پاکستان کرکٹ بورڈ کے ڈائریکٹر جنرل جاوید میانداد نے بھی عمران خان کی عیادت کی۔