’’ پنجابی انٹرنیشنل فلم فیسٹیول‘‘ سلطان راہی مرحوم کی فلموں کے پروموز کا مذاق اڑایا گیا

پاکستان فلم انڈسٹری کی نمائندگی کرنے کے لیے موجود اداکارہ میرا بھی یہ مناظرخاموشی سے دیکھتی رہیں۔ فوٹو : فائل

---

کینیڈا میں ہونے والے'' پنجابی انٹرنیشنل فلم فیسٹیول'' میں پاکستانی پنجابی فلموں کے تعارف کے لیے پیش کیے جانے والے پرومومیں سلطان راہی مرحوم کے دشمنوں کو للکارنے اور ماردھاڑکے مناظردیکھ کرشرکاء مذاق اڑاتے رہے۔

پاکستان فلم انڈسٹری کی نمائندگی کرنے کے لیے موجود اداکارہ میرا بھی یہ مناظرخاموشی سے دیکھتی رہیں۔ جب کہ تعارفی تقریب کے میزبان شرکاء کوچپ رہنے کا مشورہ دیتے رہے۔ تفصیلات کے مطابق کینیڈا میں ہونیوالے 'پنجابی انٹرنیشنل فلم فیسٹیول' میں بھارت اورپاکستان سمیت دیگرممالک میں بنائی جانیوالی پنجابی فلموں کو نمائش کے لیے پیش کیا گیا۔

فیسٹیول میں جن جن ممالک نے شرکت کی ان ممالک کی فلم انڈسٹریوں کے تعارفی پرومو بھی دکھائے گئے۔ اس موقع پرجب پاکستانی پنجابی فلموں کا تعارف کروایا گیا توپرومو میں فلم انڈسٹری پربرسوں راج کرنیوالے اداکارسلطان راہی مرحوم کے مناظرشامل تھے جن میں وہ ''دشمنوں کوللکار رہے ہیں اورایک گن سے کئی لوگوںکو ماررہے ہیں''۔