نواز شریف سے اڈیالہ جیل میں ن لیگی رہنماؤں کی ملاقات

ملاقات کے موقع پر سیکورٹی کے انتہائی سخت انتظامات کیے گئے تھے۔ فوٹو:فائل

---

سابق وزیراعظم نواز شریف اور مریم نواز سے اڈیالہ جیل میں آج مسلم لیگ (ن) کے متعدد رہنماؤں نے ملاقات کی۔

ایون فیلڈ ریفرنس میں سزایافتہ نواز شریف، مریم نواز اور کیپٹن (ر) صفدر کو اڈیالہ جیل میں قید ہوئے 5 ہفتے ہوگئے ہیں اور ان سے آج ملاقات کا دن تھا، تینوں مجرموں کو کمروں سے نکال کر کانفرنس روم میں بٹھایا گیا جہاں انہوں نے پہلے آپس میں ملاقات کی اور پھر مسلم لیگ (ن) کے رہنماؤں سے ملاقاتیں کیں۔

جیل انتظامیہ نے نواز شریف سے ملاقات کرنے والوں کی فہرست مرتب کررکھی تھی اور صرف ان افراد کی ملاقات کرائی گئی جن کا نام فہرست میں شامل تھا، اس موقع پر سیکورٹی کے انتہائی سخت انتظامات کیے گئے تھے۔

نواز شریف، مریم نواز اور کیپٹن (ر) صفدر سے ملاقات کرنے والوں میں مائزہ حمید، کشمالہ طارق، مشاہد حسین سید، حاصل بزنجو، طاہرہ اورنگزیب، نجمہ حمید،عرفان صدیقی اور پرویز رشید سمیت سابق گورنر سندھ محمد زبیر عمر شامل تھے۔