شری شانتھ کے تین اداکاراؤں سے روابط کا انکشاف

کاسٹنگ ڈائریکٹر نے ماڈلز کی تصاویر بھی بھیجیں، لیپ ٹاپ سے معلومات حاصل۔ فوٹو: فائل

---

ممبئی پولیس نے شری شانتھ کے تین اداکاراؤں سے روابط کا بھی پتا لگا لیا۔

سینئر اہلکار کے مطابق پیسر خود بالی ووڈ اور ملیالم فلموں میں ہیرو بننے کا خواہشمند تھا جس کیلیے سرمایہ کاری بھی شروع کر دی تھی،اس کام میں بکی دوست جیجو اور بھائی دیپو بھی ان کی مدد کر رہے تھے،شری شانتھ کا خود بھی دو بڑے پروڈکشن ہاؤسز اور ایک معروف ایکشن ہیرو سے رابطہ تھا، وہ ایک ملٹی اسٹار فلم بنانا چاہتے تھے۔



لیپ ٹاپ سے حاصل شدہ معلومات سے انکشاف ہواکہ بالی ووڈ کے ایک کاسٹنگ ڈائریکٹرسے بھی شری شانتھ کے رابطے تھے، وہ اکثر انھیں ماڈلز کی تصاویر ای میل کرتا رہتا، تحقیقاتی افسران کو شری شانتھ کی ایک بکی جوپیٹر کے ساتھ تصویر بھی ملی،دریافت شدہ رابطے کے نمبرز پر مشتمل ایک فہرست میں تمام ناموں کو کوڈز میں محفوظ کیا گیا تھا۔

پولیس کا خیال ہے کہ شری شانتھ اور بکیز کے درمیان چند ای میلز کو ڈیلیٹ کر دیا گیا ، سائبر سیل ایسے پیغامات کو تلاش کرنے کی کوشش کرے گا۔