نومنتخب وزیراعظم عمران خان کوسوشل میڈیا پرمبارک باد کے پیغامات

کرکٹ کے میدان سے اقتدار کی کرسی پر پہنچنے والے عمران خان کے وزیراعظم منتخب ہوتے ہی سوشل میڈیا پر مبارکبادوں کا سیلاب امڈ آیا،دنیا بھر سےمشہور وممتاز شخصیات اور کپتان کے چاہنے والوں نے پیغامات کا ڈھیر لگادیا۔

کھلاڑی ہوں یا سیاست دان، گلوکارہوں یا اداکار ،غرض ہر شعبہ ہائے زندگی سے تعلق رکھنے والے عمران خان کو 22سالہ جدوجہد کا صلا ملنے پر خوشی سے نہال ہیں۔

ٹوئٹر پر پرائم منسٹر عمران خان کا ہیش ٹیگ ٹاپ ٹرینڈ بن گیا جسے استعمال کرتے ہوئے صارفین عمران خان کی تصاویر کے ساتھ انہیں مبارکباد کا پیغام دے رہے ہیں۔

نوبیل انعام یافتہ ملالہ یوسفزئی نے ٹویٹر پیغام میں عمران خان اورتحریک انصاف کو شاندار کامیابی پر مبارک باد دی اور مستقبل کیلئے نیک خواہشات کا اظہار کیا۔

پاکستان عوامی تحریک کے سربراہ ڈاکٹر طاہرالقادری نے عمران خان کو مبارک باد دیتے ہوئے کہا کہ امید ہے کہ آپ عوام کے مسائل حل کرنے میں اپنی تمام تر توانائیاں صرف کریں گے۔

سابق کپتان وسیم اکرم نے ٹویٹ کیا کہ آج پاکستانی قوم کیلئے تاریخی دن ہے، پارلیمنٹ میں وزیراعظم عمران خان کی تقریر ہر پاکستانی سننا چاہتا تھا۔

شعیب اختر نے لکھا کہ اللہ کرےعمران خان نیا پاکستان بنانے اور ملک کو نئے دور میں لے جانے میں کامیاب ہو جائیں۔۔

وقار یونس نے عمران خان کو مبارک باد دیتے ہوئے لکھا کہ پوری دنیا میں موجود پاکستانی آپ کیلئے دعا گو ہیں، اللہ آپ کی حفاظت کرے۔