لوڈشیڈنگ کے خاتمے کے لئے جنگی بنیادوں پر کام کیا جائے گا نواز شریف

خواہش ہے کہ پاکستان دنیا میں محنت اور دیانت سے سربلندی حاصل کرے، نواز شریف۔ فوٹو: فائل ْ

---

مسلم لیگ (ن) کے صدر میاں نواز شریف نے کہا ہے کہ وقت کی ضرورت ہے کہ ملکی مسائل کے حل کے لئے سنجیدگی سے کام کیا جائے، لوڈشیڈنگ کے خاتمے کے لئے جنگی بنیادوں پر کام کیا جائے گا۔

رائیونڈ میں مسلم لیگ (ن) کے صدر میاں نواز شریف کی سربراہی میں ملک کی معیشت اور توانائی کے بحران کے لیے حکمت عملی کے حوالے سے اجلاس منعقد کیا گیا جس میں پارٹی کی اعلیٰ قیادت کے علاوہ نگراں وزیر بجلی و پانی نے بھی شرکت کی۔ اجلاس سے خطاب کرتے ہوئے نواز شریف کا کہنا تھا کہ ان کی خواہش ہے کہ پاکستان دنیا میں محنت اور دیانت سے سربلندی حاصل کرے۔ سابق حکومت کی ناہلی سے ملک کو کئی چیلنجز کا سامنا ہے، معیشت کی بحالی اور توانائی بحران کا خاتمے کےلئے جنگی بنیادوں پر اقدامات وقت کی عین ضرورت ہے۔

نواز شریف کا کہنا تھا کہ مسلم لیگ (ن) اقتدار میں آکر مربوط طریقے سے ملک کی خوشحالی کا سفر دوبارہ شروع کرے گی۔ پی آئی اے، ریلوے ، او جی ڈی سی ایل، پاکستان اسٹیل ملز اور واپڈا سمیت تمام خود مختار سرکاری اداروں میں گورننگ بورڈز قائم کئے جائیں گے جن میں اس میدان کے تجربہ کار اور باصلاحیت افراد کو شامل کیا جائے گا۔ ان کا کہنا تھا کہ بیرون ملک مقیم ہنر مند افراد کو وطن واپس لانے کے لئے خصوصی اسکیمیں متعارف کرائی جائیں گی جبکہ نوجوانوں کو بیروزگاری کے عذاب سے نکالنے کےلیے انہیں روزگار کے بہتر مواقع فراہم کئے جائیں گے تاکہ وہ ناصرف خود بلکہ ان جیسے دیگر افراد کے لئے بھی راہیں ہموار کرسکیں، اس کے علاوہ غریب عوام کو ان کی اپنی چھت فراہم کرنے کے لئے بھی اقدامات کئے جائیں گے۔