افغانستان میں دھماکوں اور فائرنگ کے مختلف واقعات میں 11 پولیس اہلکار ہلاک ہو گئے

صوبہ حیرات میں زیر تعمیر ہائیڈرو الیکٹرک ڈيم کے نزدیک ایک گاڑی میں نصب بم پھٹنے سے 6 پولیس اہلکار ہلاک ہو گئے۔ فوٹو: فائل

---

افغانستان میں دھماکوں اور فائرنگ کے مختلف واقعات میں 11 پولیس اہلکار ہلاک ہو گئے۔

غیر ملکی خبر رساں ایجنسی کے مطابق صوبہ ہرات میں زیر تعمیر ڈيم کے قریب ایک گاڑی میں نصب بم پھٹنے سے 6 پولیس اہلکار ہلاک ہو گئے، صوبہ ہلمند میں مختلف چیک پوسٹوں پر حملہ کے بعد طالبان اور پولیس اہلکاروں کے درمیان جھڑپوں میں 5 پولیس اہلکار ہلاک ہوگئے جبکہ افغان حکام نے 26 دہشت گردوں کی ہلاکت کا دعویٰ کیا ہے۔

صوبہ ہلمند کے گورنر کے ترجمان نے غیر ملکی خبر رساں ایجنسی کو بتایا کہ مختلف چیک پوسٹوں پر 100 کے قریب دہشت گردوں نے حملہ کیا جنہیں کئی گھنٹوں کی لڑائی کے بعد پسپا کر دیا گیا۔ ایساف کے ترجمان کے مطابق حملہ آور 50 تھے تاہم لڑائی میں ایساف کے اہلکاروں نے حصہ نہیں لیا، ترجمان نے کہا کہ 4 سے 5 جنگجوں پر مبنی 10 ٹولیاں 5 پولیس چیک پوائنٹس پر حملہ آور ہوئی تھیں۔