بالی ووڈ میں اسپاٹ فکسنگ کیس میں ملوث سری سانتھ کی زندگی پر فلم بنانے کی تیاریاں

آئی پی ایل اسپاٹ فکسنگ کیس میں ملوث بھارتی بولر سری سانتھ کی زندگی پر فلم بنائی جائے گی۔


ملائلم فلم پروڈیوسر شاجی کیلاس اور اے کے ساجن نے سری سانتھ کی زندگی پر فلم بنانے کی ٹھان لی ہے جس کی کہانی ریاست کیرالا سے تعلق رکھنے والے ایک ایسے نوجوان کی زندگی پر مبنی ہے جو اسکول کرکٹ سے ابھرنا شروع ہوتا ہے یہاں تک کہ قومی کرکٹ ٹیم میں اپنی جگہ بنالیتا ہے لیکن پھر پیسے کی لالچ اور شہرت کی ہوس اس کے کریئر کو برباد کردیتی ہے۔

دوسری جانب بالی ووڈ کے فلمی پنڈتوں نے ان کے اس فیصلے کو تنقید کا نشانہ بنایا ہے، فلمساز رامیش ترانی کا کہنا ہے کہ اسپاٹ فکسنگ اسکینڈل پر بننے والی فلم کی کامیابی کے امکانات بہت کم ہیں جبکہ مہیش بھٹ کے مطابق سری سانتھ پر ابھی صرف اسپاٹ فکسنگ کا الزام ہے اور ایسی فلمیں بنانے سے گریز کرنا چاہئے جس میں کسی کی کردار کشی ہو۔