پی ٹی آئی کے ایک اور رکن اسمبلی پر شہری کو تشدد کا نشانہ بنانے کا الزام

حکومت وقت سے اپیل ہے انصاف دلائے، فارمیسی ٹیکنیشن کامل حسین

---

سرکاری اسپتال کے ملازم نے تحریک انصاف کے رکن خیبر پختونخوا اسمبلی ضیا اللہ بنگش پر سر عام تشدد کا الزام لگایا ہے۔

کوہاٹ میں سرکاری اسپتال کے فارمیسی ٹیکنیشن کامل حسین نے پریس کانفرنس کے دوران الزام عائد کیا کہ 3 روز قبل پی ٹی آئی کے ایم پی اے ضیاء اللہ بنگش اپنے ساتھیوں کے ہمراہ ایمرجنسی وارڈ میں داخل ہوئے۔ انہوں نے پہلے ڈیوٹی پر موجود اہلکار کے بارے پوچھا، پھر ضیا اللہ بنگش ، ان کے بھائی اور دیگر ساتھیوں نے مل کر مجھے تشدد کا نشانہ بنانا شروع کردیا۔

کوہاٹ/ایم پی اے کا تشدد
پی ٹی آئی کے ایم پی اے ضیاء اللہ بنگش کا لیاقت میموریل ھسپتال میں چھاپے کے دوران ٹیکنیشن پر مبینہ تشدد۔
لیاقت ہسپتال میں ڈیوٹی پر موجود ڈسپنسر کمال حسین فارمیسی ٹیکنیشن کو ایم پی اے اور ان کے ساتھیوں نے ڈیوٹی کے دوران زد کوب کرکے تشدد کیا۔ pic.twitter.com/QPDvqvYeKM

— Sadiq (@Sadiqraxa) August 19, 2018

کامل حسین نے کہا کہ مجھ پر سرعام ظلم ہوا، 3 دن ہوگئے انصاف نہیں ملا، مجھ پر ضیا اللہ بنگش اور ان کے ساتھیوں کے تشدد کی سی سی ٹی وی وڈیو بھی موجود ہے لیکن بااثر ایم پی اے نے پولیس پر دباؤ ڈال کر سی سی ٹی وی فوٹیج کسی کو نہ دینے کا کہا ہے، حکومت وقت سے اپیل ہے مجھے انصاف دلائے۔