افغانستان میں الیکشن کمیشن آفس پر بم حملہ 2 افراد ہلاک

دھماکے کے وقت الیکشن کمیشن آفس کے باہر بڑی تعداد میں لوگ احتجاج کررہے تھے

ویب ڈیسک August 25, 2018

دھماکے کے وقت الیکشن کمیشن دفتر کے باہر مظاہرین کی بڑی تعداد موجود تھی۔ فوٹو : افغان میڈیا

افغانستان میں الیکشن کمیشن کے مرکزی دفتر کے نزدیک دھماکے میں دو افراد ہلاک اور 4 زخمی ہو گئے ہیں۔

بین الاقوامی خبر رساں ادارے کے مطابق جلال آباد میں الیکشن کمیشن کے دفتر کے نزدیک زور دار دھماکا ہوا ہے۔ دھماکے میں 2 افراد کے ہلاک اور 4 کے زخمی ہونے کی تصدیق کی گئی ہے۔ ایک زخمی کی حالت نازک بتائی جا رہی ہے۔

گورنر جلال آباد کے ترجمان آیت اللہ خغیانی کا کہنا ہے کہ دھماکا آج صبح 11 بجے ہوا۔ دھماکے کے وقت الیکشن کمیشن آفس کے باہر مظاہرین کی بڑی تعداد موجود تھی جو اُن امیدواروں کے حق میں مظاہرہ کر رہے تھے جن کے کاغذات نامزدگی دہشت گروں سے تعاون رکھنے کے الزام میں مسترد کردیے گئے تھے۔

پولیس نے جائے وقوعہ سے ابتدائی شواہد جمع کر لیے ہیں تاہم ابھی دھماکے کی نوعیت کا علم نہیں ہو سکا ہے۔ الیکشن کمیشن کے دفتر پر حملے کا یہ دوسرا واقعہ ہے۔ رواں ماہ کے اوائل میں کابل میں الیکشن کمیشن دفتر کے باہر بھی دھماکا ہوا تھا جس میں ایک اہلکار سمیت 3 افراد ہلاک ہو گئے تھے۔