ٹی 20 رینکنگ پاکستان کی ٹاپ پوزیشن خطرے سے باہر

آئرلینڈ پر افغانستان کی فتح سے زیریں نمبروں پر موجود پلیئرز کی پوزیشنز میں رد وبدل

Sports Desk August 26, 2018

آئرلینڈ پر افغانستان کی فتح سے زیریں نمبروں پر موجود پلیئرز کی پوزیشنز میں رد وبدل۔ فوٹو: اے ایف پی

ٹوئنٹی 20 رینکنگ میں پاکستانی پوزیشن بدستور خطرے سے باہر ہے۔

ٹیم رینکنگ میں بھی پاکستان کی ٹاپ پوزیشن فی الحال خطرے سے باہر ہے، گرین شرٹس کو دوسری پوزیشن کی حامل بھارتی ٹیم پر8 پوائنٹس کی برتری حاصل ہے، آسٹریلیا تیسرے، انگلینڈ چوتھے، نیوزی لینڈ پانچویں، جنوبی افریقہ چھٹے اور ویسٹ انڈیز ساتویں نمبر پر ہے، افغانستان کی ٹیم آٹھویں پوزیشن پر موجود ہے، سری لنکا کا نواں اور بنگلہ دیش کا دسواں نمبر ہے۔

بولرز رینکنگ میں ٹاپ پوزیشن بدستور افغانستان کے راشد خان کے قبضے میں ہے جبکہ شاداب خان دوسرے نمبر پر ہیں۔ آئرلینڈ کیخلاف افغان ٹیم کی سیریز میں 2-0 کی کامیابی کے بعد جاری ہونیوالی رینکنگ میں کھلاڑیوں کی ٹاپ پوزیشنز پر کوئی ردبدل دیکھنے میں نہیں آیا جہاں ٹاپ 20 بولرز میں شامل دوسرے پاکستان محمد عامر ہیں جوکہ 13 ویں نمبر پر موجود ہیں۔

اسی طرح بیٹسمینوں میں آسٹریلیا کے ایرون فنچ کی پہلی پوزیشن ہے جبکہ پاکستان کے فخر زمان دوسرے اور بابر اعظم پانچویں نمبر پرہیں۔ افغانستان کے ہارڈ ہٹرحضرت اللہ زازئی نے کیریئر بیسٹ 514 پوائنٹس کی صورت میں پایا جس کی بدولت وہ بیٹسمین رینکنگ میں 39 ویں نمبر پر پہنچ گئے ہیں، جہاں پر محمد شہزاد بدستور ٹاپ رینکڈ افعان پلیئر ہیں جوکہ 647 پوائنٹس کے ساتھ 13 ویں نمبر پر موجود ہیں۔ بولرز میں مجیب الرحمان نے سب سے زیادہ 25 درجے کی چھلانگ سے 38 ویں پوزیشن حاصل کرلی ہے۔