کپور خاندان کا راج کپور اسٹوڈیو فروخت کرنے کا فیصلہ

سینے پر پتھر رکھ کر اسٹوڈیو کو فروغ کرنے کا فیصلہ کیا ہے، رشی کپور

ویب ڈیسک August 26, 2018

راج کپوراسٹوڈیو کا سنگ بنیاد اداکار راج کپور نے 1948ء میں اپنے ہاتھوں سے رکھا تھا (فوٹو: فائل)

بالی ووڈ انڈسٹری سے وابستہ کپور خاندان نے مشہور راج کپور اسٹوڈیو کو فروخت کرنے کا فیصلہ کرلیا ہے۔

بھارتی میڈیا رپورٹس کے مطابق ممبئی میں واقع کپور خاندان کے تاریخی اسٹوڈیو کی فروخت کے حوالے سے راج کپور کے بیٹے اور اداکار رشی کپور کا کہنا ہے کہ کچھ دنوں سے ہم اسٹوڈیو کو جدید ترین ٹیکنالوجی کے ذریعے تزئین و آرائش کے بارے میں سوچ رہے تھے لیکن حقیقت میں اس مٹی کے ڈھیر کو ازسرنو تعمیر کرنا ممکن نہیں اور پورا کپور خاندان اس بارے میں بہت جذباتی بھی ہے۔

انہوں نے مزید کہا کہ اب تک اسٹوڈیو کی تعمیر کے لیے مناسب سرمایہ کاری نہیں ہوئی کہ اسے مستقل بنیادوں پر چلایا جاسکے لیکن ہمیں اس ضمن میں ایک بڑے منصوبے پر کام کرنا ہوگا اور درست فیصلے کرنے ہوں گے کیوں کہ راج کپور اسٹوڈیو آتشزدگی سے پہلے ہی یہ ایک سفید ہاتھی بن چکا تھا اور نقصان میں جارہا تھا۔

2017 September 16th. Gutted by a devastating inferno. Scars shall remain but will build a state of the art studio. pic.twitter.com/MyKKCfhgBr
— Rishi Kapoor (@chintskap) September 19, 2017

رشی کپور نے کہا کہ اسٹوڈیو کو صرف چند فلموں، ٹی وی سیریلز اور اشتہارات کے لیے بک کیا جاتا تھا جبکہ لوگ شوٹنگ کے لئے رعایت پر بھی اصرار کرتے تھے ان تمام تر باتوں کو مد نظر رکھتے ہوئے سینے پر پتھر رکھ کر سوچ سمجھ کر اسٹوڈیو کو فروخت کرنے کا فیصلہ کیا ہے۔

یہ خبر بھی پڑھیں: ممبئی کے اسٹوڈیو میں آتشزدگی سے راج کپور کے تاریخی ملبوسات جل کر راکھ

یاد رہے کہ راج کپوراسٹوڈیو کا سنگ بنیاد اداکار راج کپور نے 1948ء میں اپنے ہاتھوں سے رکھا تھا جہاں پہلی فلم 'آگ' شوٹ کی گئی، اسٹوڈیو کے بینر تلے بالی ووڈ کی کئی تاریخی فلمیں ریلیز ہوئی ہیں جن میں برسات (1949ء)، آوارہ (1951ء)، بوٹ پالش (1954ء)، شری 420 (1955ء) اور دیگر شامل ہیں۔