کراچی میں توقع سے بڑھ کرپیار ملا جواب محبت سے دینگے عمران

کراچی میں انھیں تنظیم سازی میں نمائندگی ملنی چاہیے جنھوں نے بڑی تعداد میں ووٹ دیے فوٹو: اے ایف پی

---

تحریک انصاف کے چیئرمین عمران خان نے کہا ہے کہ کراچی میں تحریک انصاف کو توقع سے کہیں بڑھ کر محبت ملی ہے۔

اب اس محبت کاجواب محبت سے ہی دیا جائے گا اس لیے وہ صحت یاب ہوتے ہی پہلا دورہ کراچی کاکریں گے اوروہاں کے تنظیمی سیٹ اپ سے متعلق بعض اہم فیصلے کئے جائینگے ۔ یہ بات انھوں نے کراچی سے تعلق رکھنے والے تحریک انصاف کے قومی و صوبائی اسمبلی کے امیدواروں کے وفدسے بات چیت کرتے ہوئے کہی وفدکی قیادت این اے 253 کے امیدواراشرف جبارقریشی نے کی۔



عمران خان نے کہا کہ کراچی کے ان علاقوں اورطبقات کو تنظیم سازی میں نمائندگی ملنی چاہیے جنھوں نے پارٹی کو بڑی تعداد میں ووٹ دیے۔ عمران خان نے کہا کہ کراچی میں پارٹی کی مثبت عوامی مقبولیت کے نتیجے میںملنے والے ووٹوں کو کامیابی کے نتائج میں تبدیل کیا جائیگاتحریک انصاف کراچی کے عوام کو تنہا چھوڑے گی نہ مایوس کریگی،یہاں کے معصوم شہریوں کو ٹارگٹ کلرز اور بھتہ خوروں کے رحم و کرم پرنہیں چھوڑا جاسکتا تحریک انصاف کراچی میں قیام امن کیلیے بھرپور کردار ادا کریگی ۔