شرجیل میمن کے خون میں الکحل شامل نہیں میڈیکل رپورٹ

شرجیل میمن کے خون کی ایک اور رپورٹ کا انتظار ہے، ڈی آئی جی جیل خانہ جات ناصر آفتاب۔ فوٹو : فائل

---

KARACHI: نجی اسپتال نے شرجیل میمن کی میڈیکل رپورٹ جاری کردی ہے جس کے مطابق ان کے خون میں الکحل شامل نہیں ہے۔

شرجیل میمن کے کمرے سے ملنے والی شراب کی بوتلوں کے معاملے کے بعد سابق وزیراطلاعات سندھ کے میڈیکل ٹیسٹ کے لیے خون کے نمونے لیے گئے تھے، ایک خون کا نمونہ ضیاءالدین اسپتال اور دوسرا نمونہ اسٹیڈیم روڈ پر واقع نجی اسپتال بھیجا گیا تھا جس میں سے ایک کی رپورٹ جاری کردی گئی ہے۔

اس خبر کو بھی پڑھیں : شرجیل میمن کے کمرے پرچھاپہ، شراب ومنشیات برآمد

نجی اسپتال کی جانب سے جاری کی گئی میڈیکل رپورٹ کے مطابق شرجیل میمن کے خون میں الکحل شامل نہیں ہے تاہم ضیاءالدین اسپتال کی رپورٹ کا انتظار کیا جارہا ہے۔

دوسری جانب ڈی آئی جی جیل خانہ جات ناصر آفتاب کا کہنا ہے کہ شرجیل میمن کے خون کی ایک اور رپورٹ کا انتظار ہے جب کہ جیل عملے کے خلاف غفلت اور لاپرواہی کی کارروائی کی جائے گی۔



واضح رہے کہ چند روز قبل چیف جسٹس پاکستان ثاقب نثار نے ضیاالدین اسپتال کا اچانک دورہ کیا تھا جس کے دوران وہاں زیر علاج سابق وزیراطلاعات سندھ شرجیل انعام میمن کے کمرے سے شراب کی بوتلیں، سگریٹ کے پیکٹ اور دیگر منشیات برآمد ہوئی تھیں۔