اقتصادی کونسل کے رکن عاطف میاں کیخلاف توجہ دلاؤ نوٹس

جے یو آئی (ف) نے حکومت کی اقتصادی کونسل کے رکن عاطف میاں کے خلاف قومی اسمبلی اور سینیٹ میں توجہ دلاؤ نوٹس جمع کرادیے۔

جمعیت علمائے اسلام (ف) نے عاطف میاں کو اقتصادی مشاورتی کونسل کا رکن بنانے کے خلاف توجہ دلاؤ نوٹس قومی اسمبلی اور سینیٹ میں جمع کرائے ہیں۔ توجہ دلاؤ نوٹس میں کہا گیا ہے کہ عاطف میاں مرزا مسرور قادیانی کے مالیاتی مشیر تھے، وہ لندن اور جنوبی افریقہ میں بھی مرکز قادیان سے منسلک رہے ہیں۔ نوٹس کے مطابق وزیر اعظم اسلامی جمہوریہ پاکستان عمران خان کی جانب سے عاطف میاں کو اقتصادی مشاورتی کونسل کا رکن بنانا باعث تشویش ہے۔


یہ بھی پڑھیں: وزیراعظم نے 18 رکنی اقتصادی مشاورتی کونسل تشکیل دے دی

واضح رہے کہ وزیر اعظم عمران خان نے ملکی معاشی مسائل سے نبرد آزما ہونے کے لیے 18 رکنی اقتصادی مشاورتی کونسل تشکیل دی ہے۔ اس میں امریکا کی پرنسٹن یونیورسٹی کے ڈیپارٹمنٹ آف اکنامکس اور ووڈرو ولسن اسکول آف پبلک پالیسی کے پروفیسر ڈاکٹر عاطف میاں کو بھی شامل کیا گیا ہے۔