سی پیک کی سیکیورٹی پر کوئی سمجھوتہ نہیں کیا جائے گا آرمی چیف

آرمی چیف سے چینی سفیر کی ملاقات، سی پیک کے معاملے پر تبادلہ خیال (فوٹو: آئی ایس پی آر)

---

آرمی چیف جنرل قمر جاوید باوجوہ نے ایک بار پھر واضح کیا ہے کہ سی پیک کی سیکیورٹی پر کوئی سمجھوتہ نہیں کیا جائے گا۔

ڈی جی آئی ایس پی آر میجر جنرل آصف غفور کے مطابق پاکستان میں متعین چینی سفیر یاؤجنگ نے پاک فوج کے سربراہ جنرل قمر جاوید باجوہ سے ملاقات کرکے باہمی دلچسپی کے امور اور خطے کی سیکیورٹی صورتحال پر تبادلہ خیال کیا۔

چینی سفیر نے حال ہی میں ہونے والے چینی وزیر خارجہ کے کامیاب دورہ پاکستان اور سی پیک کے لیے پاکستان میں حمایت کو سراہا۔

China’s Amb to Pak met COAS. Discussed matters of mutual interest & regional security. Amb appreciated conduct of successful visit of Chinese Foreign Minister and support for CPEC in Pak. COAS reiterated that CPEC is eco future of Pak and its security shall never be compromised. pic.twitter.com/fn2pxLBk39

— DG ISPR (@OfficialDGISPR) September 11, 2018

اس موقع پر آرمی چیف نے سی پیک کو پاکستان کا معاشی مستقبل قرار دیتے ہوئے کہا کہ پاک چین راہداری منصوبے کی سیکیورٹی پر کوئی سمجھوتہ نہیں کیا جائے گا۔

واضح رہے کہ برطانوی اخبار فنانشل ٹائمز نے اپنی رپورٹ میں دعویٰ کیا تھا کہ پاکستان کی حکومت چین کے ساتھ ہونے والے سی پیک معاہدوں پر دوبارہ غور کرے گی اور اس حوالے سے نئے سرے سے شرائط طے کی جائیں گی۔

یہ بھی پڑھیں: چین نے سی پیک سے متعلق فنانشل ٹائمز کی رپورٹ مسترد کردی

فنانشل ٹائمز کی رپورٹ پر مشیر تجارت عبدالرزاق داؤد کا کہنا تھا کہ اخبار نے ان کا انٹرویو سیاق وسباق سے ہٹ کر شائع کیا جب کہ اس حوالے سے وزارت تجارت کا کہنا تھا کہ سی پیک کے مستقبل پر پاکستان اور چین کے درمیان اتفاق ہے، پاکستان سی پیک کو رول بیک نہیں کررہا، پاکستان نے چین کے وزیر خارجہ کو یقین دہانی کرائی ہے کہ سی پیک قومی ترجیحی منصوبہ ہے۔

علاوہ ازیں چینی سفارت خانے نے سی پیک سے متعلق فنانشل ٹائمز کی رپورٹ کو مسترد کرتے ہوئے کہا تھا کہ پاکستان اور چین کے درمیان اقتصادی راہداری کے حوالے سے مکمل اتفاق رائے ہے کہ یہ پراجیکٹ دونوں ممالک کے لیے سودمند ہے اور دونوں حکومتیں اس کو پاکستان کی ضروریات کے مطابق اور ترقی کے لیے آگے لے کر بڑھیں گی۔