نوابشاہ کے گاؤں میں سرچ آپریشن30افراد گرفتاربھاری اسلحہ برآمد

سکرنڈ کے قریب زمین کے تنازع پر 2برادریوں میں کشیدگی، اہلکار کے زخمی ہونے کے بعد پولیس حرکت میں آگئی، آپریشن کرکے فریقین کے 30 افراد کو حراست میں لے لیا، بھاری اسلحہ برآمد۔


تفصیلات کے مطابق گزشتہ روز سکرنڈ کے قریب گوٹھ دلیل دیرو میں رند اور ملاح برادریوں کے درمیان زمین کے تنازع پر مسلح تصادم میں گولی لگنے سے پولیس اہلکار غلام حسین کے شدید زخمی ہونے کے واقعے کے بعد ایس ایس پی نثار چنہ کی ہدایت پر ضلع بھر کی درجنوں پولیس موبائلیں دلیل دیرو پہنچ گئیں اور گائوں کا محاصرہ کرکے آپریشن شروع کردیا۔اس دوران رند برادری کے 20 افراد گرفتار کرلیے جس میں پیپلز پارٹی کو الوداع کہنے والے میر عرفان رند بھی شامل ہیں جبکہ ملاح برادری کے 10 افراد گرفتار کیے گئے۔

پولیس نے رند برادری کے گرفتار افراد کے قبضے سے رائفلیں، پسٹل اور ہزاروں کی تعداد میں گولیاں و کارتوس برآمد کیے ہیں۔ گرفتار شدگان کے خلاف سکرنڈ تھانے میں مقدمہ درج کرلیا گیا ہے مگر پکڑے گئے اسلحے اور گولیوں کا ایف آئی آر میں اندراج نہیں کیا گیا۔