سپریم کورٹ نے دہری شہریت کیس کا فیصلہ محفوظ کرلیا

ملک کی بدنامی کا باعث بننے والوں کے ساتھ کوئی رعایت نہیں ہونی چاہیے، چیف جسٹس کے ریمارکس

ویب ڈیسک September 24, 2018

ڈاکٹرز اور اساتذہ کی دہری شہریت میں قباحت نہیں، سپریم کورٹ فوٹو: فائل

سپریم کورٹ نے دہری شہریت سے متعلق ازخود نوٹس کیس کا فیصلہ محفوظ کرلیا ہے۔

چیف جسٹس پاکستان جسٹس ثاقب نثار کی سربراہی میں سپریم کورٹ کے 3 رکنی بینچ نے ججز اور سرکاری افسروں کی دہری شہریت سے متعلق ازخود نوٹس کیس کی سماعت کی۔ دوران سماعت چیف جسٹس نے استفسار کیا کہ ایک کٹیگری ان لوگوں کی ہے جو پیدا ہی بیرون ملک ہوئے، دوسری کٹیگری ان کی ہے جو تعلیم حاصل کرنے گئے اور وہاں شہریت لی، تیسری کٹیگری ان کی ہے جنہوں نے دوران سرکاری ملازمت شہریت لی، کیا تینوں کٹیگریز کے ساتھ سلوک یکساں ہونا چاہیے۔

اس خبر کو بھی پڑھیں : پاک فوج میں دہری شہریت پر پابندی ہونی چاہیے، چیف جسٹس

عدالتی معاون شاہد حامد نے عدالت کے روبرو موقف اختیار کیا کہ 2002 سے آج تک کسی پاکستانی کی شہریت منسوخ نہیں ہوئی، غیر ملکی شہریت کا مقصد نقل و حرکت میں آسانی ہے، بعض لوگ اپنے بچوں کو غیر ملکی شہریت دلواتے ہیں، سرکاری اداروں میں دہری شہریت کے حامل افسر نہیں ہونے چاہیے، حکومت کو سکیورٹی مسائل مد نظر رکھ کر فیصلہ کرنا ہوگا، بہتر ہو گا کہ عدالت حکومت اور پارلیمنٹ کو فیصلہ کرنے دے۔

جسٹس عمر عطا بندیال نے ریمارکس دیے کہ ڈاکٹرز اور اساتذہ کی دہری شہریت میں قباحت نہیں لیکن بعض عہدوں پر ملک سے مکمل وفاداری لازمی ہے، جسٹس اعجاز الاحسن نے ریمارکس دیے کہ ایک ساتھ دو کشتیوں میں سوار نہیں ہوا جاسکتا۔

چیف جسٹس نے ریمارکس دیے کہ پالیسی بنانے کا اختیار حکومت کو ہے، اراکین پارلیمنٹ کے لیے دہری شہریت پر پابندی ہے تو بیوروکریٹس پر کیوں نہیں، ایک ڈی آئی جی نے کینیڈا کی خاتون سے شادی کی، بظاہر ان کے بچوں کی حوالگی کا مسئلہ عدالت میں آیا لیکن اصل جھگڑا کینیڈا کے پیسے سے بنے گھر کا تھا، ملک کی بدنامی کا باعث بننے والوں کے ساتھ رعایت نہیں ہونی چاہیے، ملک کو دھوکہ دیکر بیرون ملک جائیدادیں بنانے والے آج بھی عہدوں پر ہیں، سرکاری افسران باہر جاکر چھٹیاں لیتے رہے فارغ ہونے پر عدالت چلے گئے۔

اس خبر کو بھی پڑھیں : دہری شہریت پر نا اہل ارکان کو فی کس 5 لاکھ ادائیگی کا حکم

عدالت عظمیٰ نے دہری شہریت سے متعلق ازخود نوٹس کیس کا فیصلہ محفوظ کرتے ہوئے ریمارکس دیے کہ سرکاری افسران کی دہری شہریت پر حکومت کو سفارشات دیں گے اور اہم عہدوں پردہری شہریت کے حامل افراد سے متعلق تحفظات کا اظہار بھی کریں گے۔