عمران خان صرف غریبوں پر ٹیکس لگانے کے لیے اقتدارمیں آئے ہیں خورشید شاہ

عمران خان نے اقتدار میں آنے سے پہلے عوام کو بڑے بڑے سہانے خواب دکھائے کہ دودھ کی ندیاں بہا دوں گا، خورشید شاہ۔ فوٹو:فائل

---

پیپلزپارٹی کے رہنما سید خورشید شاہ کا کہنا ہے کہ منی بجٹ دیکھ کر لگتا ہے کہ عمران خان صرف غریبوں پر ٹیکس لگانے کے لیے برسر اقتدار آئے ہیں۔

پارلیمنٹ ہاؤس میں میڈیا سے بات کرتے ہوئے سابق اپوزیشن لیڈر سید خورشید شاہ کا کہنا تھا کہ عمران خان نے عوام کوسہانے خواب دکھائے کہ دودھ کی ندیاں بہا دوں گا، لیکن منی بجٹ کو دیکھ کر لگتا ہے کہ عمران خان صرف غریبوں پر ٹیکس لگانے کے لیے برسرِ اقتدار آئے ہیں، گیس اور پیٹرول سمیت دیگرچیزوں پرٹیکس غریب کی جیب سے نکالا جا رہا ہے۔

اس خبرکوبھی پڑھیں: ملک میں جنگل کا قانون ہے کوئی پوچھنے والا نہیں

خورشید شاہ نے کہا کہ پیپلزپارٹی نے کبھی غریب کے استعمال کی چیزیں مہنگی نہیں کیں، عوام کو اب پیپلزپارٹی کا دور یاد آئے گا، عمران خان نے یہ بھی دعویٰ کیا تھا کہ سارے ڈاکوؤں کو پکڑ کر پیسہ واپس لاؤں گا، اب آگے دیکھیں کیا ہوتا ہے۔

اس خبرکوبھی پڑھیں: چیف جسٹس اپنی جماعت بناکر سیاست میں آجائیں

رہنما پی پی کا کہنا تھا کہ حکومت سارے ملک میں مرضی کا بلدیاتی نظام نہیں لا سکتی، بلدیاتی نظام خالصتاً صوبائی معاملہ ہے، بلدیاتی نظام کا اختیار صوبائی حکومتوں کے پاس ہے، وفاقی حکومت صرف پنجاب یا کے پی سےمتعلق فیصلہ کر سکتی ہے۔

انہوں نے مزید کہا کہ دنیا میں سب سے کم ٹیکس ریشو ہمارا ہے، وہی 8 لاکھ ٹیکس ادا کرنے والے ہیں جن کو بڑھانے کی کوئی بات نہیں کی گئی، سسٹم کو ٹھیک کرنے کے لیے ایف بی آر کا چیئرمین پارلیمنٹ کو لگانا چاہیے۔