بھارتی نیوی افسر راؤنڈ دا ورلڈ سولو ریس کے درمیان دو روز قبل لاپتہ ہوئے تھے۔ فوٹو : ٹویٹر
بین الاقوامی خبر رساں ادارے کے مطابق جمعے کے روز سمندری طوفان میں پھنس جانے والے بھارتی نیوی کے کمانڈر ابھیلاش ٹومی کو گزشتہ شب ریسکیو کر لیا گیا ہے۔ بھاری نیول کمانڈر کشتی رانی کے عالمی مقابلے 'دنیا کے گرد چکر' کے سولو ریس میں حصہ لے رہے تھے۔
بھارتی نیول افسر بین الاقوامی ریسکیو مشن کے دوران مغربی آسٹریلیا کے ساحل سے 3 ہزار 5 سو کلو میٹر دور سمندروں کے بیچوں بیچ اپنی کشتی میں زخمی حالت میں پائے گئے تھے۔ ریسکیو مشن میں آسٹریلوی، فرانسیسی اور بھارتی نیوی کے اہلکاروں نے حصہ لیا۔
سمندر میں 130 کلو میٹر فی گھنٹا کی رفتار سے چلنے والی طوفانی ہواؤں کے تھپیڑوں سے 39 سالہ ابھیلاش کے کمر کی ہڈی میں فریکچر ہوا ہے اور 48 گھنٹے بعد انہیں پینے کو پانی ملا جس کے باعث وہ کافی کمزوری اور نقاہت کا شکار ہیں۔ انہیں فرانسیسی بحری جہاز کے ذریعے محفوظ مقام پر تبدیل کیا جا رہا ہے۔
First video from @IndianNavy P-8I yesterday of the moment the crew spotted @AbhilashTomy’s boat in the southern Indian Ocean. pic.twitter.com/8EnGpd8Mm5
— Shiv Aroor (@ShivAroor) September 24, 2018
بھارتی بحریہ کے کمانڈر کشتی رانی کے عالمی مقابلے کے درمیان سمندری طوفان کے باعث اپنے راستے سے بھٹک گئے تھے اور مقابلے کے منتظمین سے ان کا رابطہ منقطع ہو گیا تھا۔ دو دن کی تلاش کے بعد بھیلاش کی کشتی کو آسٹریلوی ساحل سے دور دیکھا گیا تھا۔
واضح رہے کہ گولڈن گلوب ریس ' راؤنڈ دا ورلڈ سولو ریس 2018' کا آغاز یکم جولائی کو فرانس میں ہوا تھا۔ 30 ہزار میل طویل ریس میں 18 کشتی ران حصہ لے رہے ہیں۔ کشتی رانوں کو طویل اور کٹھن سفر بغیر کسی بیرونی مدد اور جدید سہولیات کے اکیلے ہی طے کرنا ہے۔
تبصرے
ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔