آخری چیمپئنز ٹرافی میں سنسنی خیز میچز کا آغاز آج سے ہو گا

بھارت اور جنوبی افریقہ کے درمیان میچ پاکستانی وقت کےمطابق دوپہر2 بج کر 30 منٹ پر صوفیہ گارڈنز میں کھیلا جائے گا۔ فوٹو: آئی سی سی

---

برطانیہ میں چیمپئنز ٹرافی میں سنسنی خیز میچز کا آغاز آج سے شروع ہو رہا ہے، پہلے میچ میں عالمی نمبرایک بھارت اورجنوبی افریقہ کی ٹیمیں ایک دوسرے کے مد مقابل ہوں گی۔

اس تاریخی ایونٹ میں 8 ٹیمیں ایک دوسرے کے مد مقابل ہیں، دیکھنا یہ ہے کہ کیا پیٹرسن سےمحروم انگلش ٹیم ایلسٹر کُک کی قیادت میں پہلی بار ٹرافی اڑا لے گی، بھارتی ٹیم دھونی کی کپتانی میں آئی پی ایل اسپاٹ فکسنگ اسکینڈل کے پریشر میں اپنی بھرپور کارکردگی کا مظاہرہ کر پائے گی اور کیا کینگروز فٹنس مسائل سے دوچار مائیکل کلارک کی قیادت میں جیت کی ہیٹ ٹرک مکمل کرنے میں کامیاب رہیں گے۔

بھارت اور جنوبی افریقہ کے درمیان پہلا میچ پاکستانی وقت کےمطابق آج دوپہر2 بج کر 30 منٹ پر صوفیہ گارڈنز میں کھیلا جائے گا۔ پاکستان 7 جون کو اپنا پہلا میچ کالی آندھی ویسٹ انڈیز کےخلاف کھیلےگا، پاکستان ایونٹ میں اپنےگروپ میچز ویسٹ انڈیز، بھارت اور جنوبی افریقہ کے خلاف کھیلے گا اور اسے سیمی فائنل تک رسائی کے لیے ان میں سے کسی دو ٹیموں کو لازمی شکست دینا ہوگی۔ موجودہ چیمپئنز ٹرافی اس لحاظ سےبھی یادگار ہےکہ آئی سی سی اس کو آخری ایونٹ قرار دے چکی ہے، اس کی جگہ 2017 سے ٹیسٹ چیمپئن شپ شروع کی جا رہی ہے۔