میرے خلاف مقدمہ انتقامی کارروائی ہے فاروق ستار

میں صرف ایک سیاسی رہنما نہیں بلکہ ایک ذمے دار اور معتبر شہری بھی ہوں

Staff Reporter October 05, 2018

پی آئی بی دھرنے میں دیگر سیاسی جماعتوں کے رہنماؤں کی طرح شرکت کی تھی۔ فوٹو: فائل

ایم کیو ایم پاکستان کے رہنما ڈاکٹر فاروق ستارنے ایس پی گلشن اقبال مرتضیٰ بھٹو کی طرف سے سرکار کی مدعیت میں درج کی جانے والی ایف آئی آر کو انتقامی کارروائی قرار دیا ہے۔

ڈاکٹر فاروق ستار نے کہا ہے کہ جب سے اغوا کی وارداتوں میں تشویشناک اضافہ ہوا ہے میں نے صوبائی حکومت اور انتظامیہ کو سخت تنقید کا نشانہ بنایا ہے ، ایف آئی آر میں جو الزامات لگائے گئے ہیں انھیں قطعی لغو اور بے بنیاد قرار دیتا ہوں جبکہ حقیقت یہ ہے کہ دیگر سیاسی جماعتوں کے رہنماؤں کی طرح لڑکی کے اہلخانہ کی جانب سے کیے گئے دھرنے اور احتجاج میں اظہار یکجہتی کے لیے شرکت کی تھی۔

رہنما ایم کیو ایم نے کہا کہ ایف آئی آر سراسر جھوٹ پر مبنی ہے ، وہاں لوگوں کو پرامن رہنے کی تلقین کی اور اپنے ساتھیوں کے ہمراہ ٹریفک کی بحالی کو ممکن بنا کر ٹریفک رواں دواں کراتے ہوئے حالات کو بہتر بنانے میں بھرپور مدد کی۔