فون پر بینک اکاؤنٹ کی معلومات دینے والا شخص 20 لاکھ روپے سے محروم

10 لاکھ روپے بشریٰ ظہور نامی خاتون کےاکاؤنٹ میں منتقل ہوئے، ایف آئی اے رپورٹ :فوٹو:فائل

---

موبائل فون پر بینک اکاؤنٹس کی معلومات دینے والا شخص 20 لاکھ روپے سے محروم ہوگیا۔

ایکسپریس نیوزکے مطابق کراچی کا شہری موبائل فون پر بینک اکاؤنٹس کی معلومات دے کر 20 لاکھ روپے سے ہاتھ دھو بیٹھا۔ مدعی بنت خان نے ایف آئی اے کمرشل بینک سرکل میں مقدمہ درج کرادیا ہے۔

مدعی نے کہا کہ اسے 29 ستمبر کو ایک نامعلوم کال موصول ہوئی، جعل ساز نے مجھ سے بینک اکاؤنٹس کی تفصیلات پوچھیں اور میرے انکار پر وزیرستان میں میرے مکانات مسمار کرنے کی دھمکیاں دیں، میں نے خوف زدہ ہوکر تمام معلومات فراہم کردیں۔ اگلے روز معلوم ہوا کہ میرے اکاؤنٹ سے 20 لاکھ روپے کی رقم نکلوائی جاچکی ہے۔

یہ پڑھیں: کراچی میں فالودہ بیچنے والا ارب پتی بن گیا

ایف آئی اے حکام کا کہنا ہے کہ ایف آئی اے کمرشل بینک سرکل نے مقدمہ درج کرکے تحقیقات شروع کردی ہیں جب کہ مدعی کی جانب سے دی جانے والی درخواست بینکنگ کورٹ میں جمع کرادی گئی ہے۔

ایف آئی اے حکام کے مطابق ابتدائی تحقیقات میں انکشاف ہوا ہے کہ جعل سازی کے ذریعے عوام کو بیوقوف بنا کران کے اکاؤنٹس سے رقوم نکلوانے والا گروہ کراچی سے پنجاب تک پھیلا ہوا ہے۔ متاثرہ شخص بنت خان کے اکاؤنٹ سے رقم نکلوانے والے ملزمان میں محمد اقبال، محمد اسلم، رحمان و دیگر شامل ہیں جنہوں نے مختلف حصوں میں بینک سے رقوم نکالیں۔

یہ بھی پڑھیں: بینک کا نمائندہ بن کر لوگوں کو جعلی فون کالز کی جارہی ہیں

ابتدائی تفتیش کے مطابق 10 لاکھ روپے جھنگ کی رہائشی خاتون بشریٰ ظہور کے اکاؤنٹ میں منتقل ہوئے اور 10 لاکھ کی رقم نکالنے کے لیے 25 صارفین کے موبائل اکاؤنٹس استعمال ہوئے، فراڈ کی رقم بہاول نگر میں اومنی موبائل والٹ اکاؤنٹس کے ذریعے نکالی گئی۔

ایف آئی اے حکام کا کہنا ہے کہ فراڈ کی مزید تحقیقات اور ملزمان کی گرفتاری کے لیے کوششیں جاری ہیں، جلد ہی ملزمان کو کیفرکردار تک پہنچائیں گے تاہم عوام سے بھی درخواست ہے کہ موبائل فون پر کسی کو بینک اکاؤنٹس کی تفصیلات نہ دیں۔