بھارت میں ٹرین الٹنے سے 7 مسافر ہلاک درجنوں زخمی

نئی دہلی جانے والے مسافر ٹرین کی انجن سمیت 6 بوگیاں پٹری سے اتر گئیں۔ فوٹو : فائل

---

بھارت میں انجن سمیت ٹرین کی 6 بوگیاں پٹری سے اترنے کے باعث 7 مسافر ہلاک اور 35 سے زائد زخمی ہوگئے ہیں۔

بھارتی میڈیا کے مطابق ریاست اترپردیش میں مغربی بنگال سے نئی دہلی جانے والی ٹرین کی ہرچند پور ریلوے اسٹیشن کے قریب انجن سمیت 6 بوگیاں پٹری سے اترگئیں جس کے نتیجے میں 7 مسافر موقع پر ہی ہلاک جب کہ 35 سے زائد زخمی ہوگئے۔

ریسکیو ادارے کے حکام کا کہنا ہے کہ علی الصبح پیش آنے والے حادثے میں زخمی ہونے والوں میں سے 9 کی حالت نازک بتائی جا رہی ہے جس کے باعث ہلاکتوں میں اضافے کا خدشہ ظاہر کیا جا رہا ہے جب کہ بوگیوں کو کاٹ کر 4 افراد کو بحفاظت نکال لیا گیا ہے۔ امدادی کاموں میں معاونت کے لیے فوج کو بھی طلب کیا گیا تھا۔

حادثے میں محفوظ رہنے والی بوگیوں کے مسافروں کو لکھنو منتقل کیا گیا ہے۔ وزیراعلیٰ اور ریلوے کے وزیر نے متاثرین کے لیے الگ الگ امدادی رقوم کا اعلان کیا ہے۔ مجموعی طور پر ہلاک ہونے والوں کے لواحقین کو 7 لاکھ ، شدید زخمی ڈیڑھ لاکھ اور معمولی زخمیوں کو 50 ہزار فی کس دیے جائیں گے۔

#SpotVisuals from Raebareli: 5 died, several injured after 6 coaches of New Farakka Express train derailed 50 m from Harchandpur railway station this morning. NDRF teams from Lucknow and Varanasi have reached the spot. pic.twitter.com/aK1jiAuReV

— ANI UP/Uttarakhand (@ANINewsUP) October 10, 2018