قطر کا ملازمت کے خواہشمندوں کیلئے پاکستان میں ویزا سنٹر کھولنے کا اعلان

قطر ویزا مرکز کے ذریعے سفری اجازت نامے کے حصول میں درپیش مشکلات کو دور کیا جائے گا۔

ویب ڈیسک October 17, 2018

قطر ویزا مرکز کے ذریعے سفری اجازت نامے کے حصول میں درپیش مشکلات کو دور کیا جائے گا۔ فوٹو:فائل

قطر کی حکومت نے ملازمت کے خواہش مندوں کے لیے پاکستان میں ویزا مرکز کھولنے کا اعلان کیا ہے۔

قطر کی حکومت نے 8 ممالک میں ویزا مراکز قائم کرنے کا فیصلہ کیا ہے تاکہ ان ممالک کے شہریوں کے لیے قطر کے سفر کو زیادہ سے زیادہ آسان بنایا جاسکے۔ قطر ویزا مرکز کے ذریعے پاکستانی ہنرمندوں کے حقوق کے تحفظ کو یقینی بنایا جائے گا اور سفری اجازت نامے کے حصول میں درپیش مشکلات کو دور کیا جائے گا۔

In a letter to Ministry of Overseas, Embassy of the State of Qatar informed Zulfikar Bukhari that the State of Qatar has selected Pakistan to be one of the eight countries where "Qatar Visa Center" will be launched to facilitate Pakistanis who want to work in #Qatar. pic.twitter.com/zKG8MasKuW
— Government of Pakistan (@GovtofPakistan) October 17, 2018

قطر میں اس وقت تقریبا ایک لاکھ 15 ہزار پاکستانی محنت کش کام کررہے ہیں اور وہاں روزگار کے نئے مواقع پیدا ہونے سے اس تعداد میں اضافے کا امکان ہے۔ پاکستان میں قطری سفارت خانے نے وزارت سمندر پار پاکستانی اور وزیراعظم کے معاون خصوصی زلفی بخاری کو خط لکھ کر اس فیصلے سے آگاہ کیا ہے۔

عرب ملک میں کام کے خواہش مند پاکستانیوں کے حقوق کے تحفظ کے لیے ان سے باقاعدہ ملازمت کا معاہدہ کیا جائے گا۔ نیز قطری مالکان اور آجروں کی جانب سے غیر ملکی ملازمین کے استحصال کے خاتمے کو بھی یقینی بنایا جائے گا۔

واضح رہے کہ 2022 کا فٹ بال کا ورلڈ کپ قطر میں ہوگا اور اس لیے بھی وہاں ملازمت اور کام کے زیادہ سے زیادہ مواقع سامنے آئیں گے۔