پاکستان کی ایف اے ٹی ایف کے وفد کو منی لانڈرنگ کے خلاف سخت اقدامات کی یقین دہانی

پاکستان انسداد منی لانڈرنگ و دہشت گردی کے قوانین کو مزید مضبوط بنائے گا، وزیر خزانہ سے وفد کی ملاقات (فوٹو : فائل)

---

وزیر خزانہ اسد عمر نے کہا ہے کہ پاکستان منی لانڈرنگ اور دہشت گردوں کی مالی معاونت کی روک تھام کے لیے مقرر کردہ عالمی معیار پر عمل درآمد کے لیے پُرعزم ہے۔

ایکسپریس نیوز کے مطابق وزیر خزانہ اسد عمر سے ایف اے ٹی ایف کے ایشیا پیسفک گروپ کے وفد نے ملاقات کی۔ وفد کی سربراہی ایشیا پیسفک گروپ کے ایگزیکٹو سیکریٹری گورڈن ہک نے کی۔ وفد نے وزیر خزانہ کو دورہ پاکستان کے مقاصد اور اپنے قیام کے دوران مختلف اسٹیک ہولڈرز سے ہونے والی ملاقاتوں کے احوال سے آگاہ کیا۔

اس موقع پر وزیر خزانہ اسد عمر کا کہنا تھا کہ پاکستان منی لانڈرنگ اور دہشت گردوں کی مالی معاونت کی روک تھام کے لیے مقرر کردہ عالمی معیار پر عمل درآمد کے لیے پُرعزم ہے، اس حوالے سے ایشیا پیسفک گروپ اور ایف اے ٹی ایف کے ساتھ مل کر جدوجہد کرنے کا عزم رکھتے ہیں، پاکستان انسداد منی لانڈرنگ و دہشت گردی کے قوانین کو مزید مضبوط بنائے گا۔