بھارتی شہر امرتسر میں ہجوم ٹرین کی زد میں آگیا 50 افراد ہلاک

علاقہ آتش بازی اور کریکر دھماکوں سے گونج رہا تھا اس دوران تیز رفتار ٹرین کی سیٹی لوگوں کو سنائی نہ دی (فوٹو: بھارتی میڈیا)

---

بھارتی ریاست پنجاب کے شہر امرتسر میں میلہ منانے والا ہجوم ٹرین کی زد میں آگیا حادثے کے نتیجے میں کم از کم 50 افراد ہلاک اور متعدد زخمی ہوگئے۔

ضلعی پولیس افسر لکھبیر سنگھ کے مطابق بڑی تعداد میں لوگ امرتسر کے علاقے دھوبی گھاٹ کے قریب جورا پھاٹک ریلوے کراسنگ پر میلے میں شریک تھے اور اس دوران علاقہ آتش بازی اور کریکر دھماکوں سے گونج رہا تھا کہ انہیں ٹریک سے آنے والی تیز رفتار ٹرین کا سائرن سنائی نہ دیا۔

ٹریک پر موجود درجنوں افراد کو ٹرین تیزی سے کچلتے ہوئے پلک جھپکتے میں روانہ ہوگئی جس کے نتیجے میں 50 افراد لقمہ اجل بن گئے جب کہ متعدد زخمی ہیں۔

VIDEO: Over 50 feared dead as train mows down Dussehra revellers near Amritsar. pic.twitter.com/HXm9QcY1rz

— The Indian Express (@IndianExpress) October 19, 2018

حادثے کے بعد مقامی اسپتالوں میں ایمرجنسی نافذ کردی گئی اور جائے حادثہ سے لاشوں اور زخمیوں کو اسپتال منتقل کردیا گیا، مقامی پولیس افسر کا کہنا ہے کہ زخمیوں میں 35 افراد کی حالت تشویش ناک ہے۔

ریاست پنجاب کے وزیر اعلیٰ نے حادثے کا نوٹس لیتے ہوئے حکام کو فوری طور پر زخمیوں کو بہترین طبی امداد فراہم کرنے کی ہدایت دی ہے اور ہنگامی بنیادوں پر تمام تر ریلیف آپریشن مکمل کرنے کا حکم دیا ہے۔